O segundo foro “A enerxía que vén”, de Economía Dixital Galicia, aborda a soberanía enerxética e a descarbonización

A enerxía é a pedra angular para o desenvolvemento económico de calquera territorio e Galicia é unha referencia polos seus recursos, polo seu potencial, a súa tradición e por toda unha cadea de valor asociada a este sector. O proceso de descarbonización e a transición enerxética abren unha fiestra de oportunidade para un novo modelo que Galicia non debe desaproveitar, e que pasa pola aposta decidida polas renovables.

Ademais, a competitividade da industria galega dependerá do futuro desenvolvemento da enerxía renovable en Galicia. Pero o camiño non é doado, sobre todo a raíz dos cambios xeopolíticos a escala global derivados dos conflitos internacionais e o seu impacto sobre o sector, o que achega un plus de incerteza a todo análise sobre a enerxía. Esta é a clave de bóveda da segunda edición do foro “A enerxía que vén”, que convoca Economía Digital Galicia e que se celebrará o próximo martes, 19, en Santiago.

Un encontro que se consolida

Nesta ocasión, serán dúas mesas de análise que se detén tanto no proceso de descarbonización da economía como na encrucillada xerada polos conflitos xeopolíticos e os resortes para garantir a soberanía e seguridade enerxética. O foro desenvolverase na Finca da Rocha, en Volta do Castro 24, Santiago, e dará comezo ás 11.00 horas. Para inscribirse, e tamén coñecer máis detalles do encontro, pode acceder á páxina dos foros de Economía Digital.

Haberá dúas mesas de análise e debate, que abordarán a seguridade e soberanía enerxética desde a perspectiva dunha economía como a galega, así como as renovables, a descarbonización e a regulación nun momento de transición como o actual. O encontro organizado por Economía Digital Galicia conta co apoio da Xunta e de Veolia.

Nome propios da enerxía

Os relatores son de excepción. Entre eles atópanse Natalia Barreiro, directora do complexo industrial Repsol na Coruña; María Couto, CEO de Xeal; Juan Diego Pérez, director da Autoridade Portuaria da Coruña, e Fernando de Llano, profesor da UDC e coordinador do informe sobre enerxía do CES. Eles serán os encargados de analizar o impacto dos cambios xeopolíticos na enerxía nun momento especialmente convulso.

Posteriormente, chegará o turno para analizar a transición enerxética desde o obxectivo de aproveitar a posición competitiva de Galicia. Os encargados diso serán Pablo Fernández Vila, director xeral de Planificación Enerxética e Minas; Santiago Rodríguez Charlón, director da división de Enerxía do centro tecnolóxico ITG; Jorge Castro, director corporativo Desenvolvemento Mercado Industrial e Terciario de Veolia en España, e Oriol Sarmiento, xerente do Clúster de Enerxías Renovables de Galicia (Cluergal). O encontro é aberto ao público, como a primeira edición do foro “A enerxía que vén” que celebrou Economía Digital Galicia tamén en Santiago.

O peche do encontro contará coa participación de Nicolás Vázquez Iglesias, secretario xeral de Industria e Desenvolvemento Enerxético da Xunta. A presentación do acto correrá a cargo de Julián Rodríguez, director de Economía Digital Galicia, e as mesas terán como moderadores aos xornalistas Cristina Díaz Pardo e Rubén Rodríguez, tamén de EDG.