A propietaria dos casinos de A Toxa e Vigo, en mans de Luckia e Cirsa, activa unha redución de capital de 9 millóns.

• Luckia, o maior grupo galego do xogo, gaña un 38% máis e supera por primeira vez os 600 millóns de ingresos

A sociedade Casino da Toxa, participada ao 50% por Luckia, antiga Egasa, e Cirsa, o principal operador do sector do xogo en España, activou unha redución de capital que ascende a 8,91 millóns. O capital social da empresa propietaria dos casinos da Toxa e de Vigo despois da redución quedaría nos tres millóns de euros, segundo as últimas anotacións do Rexistro Mercantil.

A compañía pechou o 2024 cunha facturación de 5,44 millóns de euros, un 25% máis dos 4,37 colleitados o ano anterior. A pesar do incremento de facturación a compañía non conseguiu esquivar os números vermellos, que ascenderon aos 1,14 millóns. Con todo, as perdas reducíronse respecto ao ano anterior cando pecharon o exercicio cun saldo negativo de 2,51 millóns.

O resultado de explotación, propio da actividade da empresa, alcanzou un saldo negativo de 900.800 euros, por debaixo dos 2,27 millóns do ano anterior. A compañía manexa uns activos de 7,98 millóns, lixeiramente por riba dos 7,30 de 2023.

“A 31 de decembro de 2024 a sociedade tiña fondos propios negativos de 7,26 millóns, un fondo de manobra positivo por importe de 812.012 euros e resultados negativos de 1,14 euros en 2024. En consecuencia, as perdas reduciron o patrimonio neto ata a metade do capital social a 31 de decembro de 2024. Con todo o anterior (…) establécese que as perdas dos exercicios 2020 e 2021 non se computarán ata o peche do exercicio 2025”, explican os xestores na memoria que acompaña ás contas, consultadas por este medio a través da solución analítica avanzada Insight View.

A sociedade dispuña ao peche do exercicio pasado de préstamos participativos que ascendían aos 7,6 millóns e que computaban como “fondos propios”. “Ao non tomarse en consideración as perdas dos exercicios 2020 e 2021 e tendo en conta dito préstamo, a sociedade ten un patrimonio neto de 4,84 millóns, un importe inferior á metade do capital social e, polo tanto, estando incursa en causas de disolución”.

Por este motivo, en xuño do ano pasado, Casino da Toxa recibiu un préstamo de dous millóns de Global Casino Technology Corporation, a sociedade coa que Cirsa canaliza o seu 50% de participación. “Adicionalmente, á mesma data, asinou un contrato con Luckia Gaming Group, para a conversión de dous millóns en préstamo participativo respecto doutro que tiña un saldo de 5,37 a 31 de decembro de 2024”, explica a memoria.

A maior parte dos ingresos da compañía proceden das máquinas de azar, que colleitaron o pasado exercicio uns 2,98 millóns e dos ingresos en mesas con 1,46 millóns. En terceiro lugar sitúanse os percibidos polos servizos de hostalería, con case 573.000 euros, seguido das propinas, con 295.000. A última partida que refiren as contas correspóndese cos “ingresos por materiais diversos”, que alcanzan os 124.000 euros

Saída a bolsa de Cirsa

A principios de xullo Cirsa, controlada polo fondo Blackstone, fixo o seu debut no mercado continuo ao finalizar con éxito o proceso de prospección da demanda cun prezo inicial de 15 euros por sesión, un valor moi similar aos 14,70 euros que alcanzaron os seus títulos na última xornada, que pechou cunha valorización de 2,46 millóns.

Con sede en Terrasa, conta con 447 casinos baixo xestión e máis de 2.500 millóns. A compañía fundada por Manuel Lao é socia en Galicia de Luckia no casino da Toxa e no de Vigo, que o maior grupo galego do xogo estreou como nova instalación anexa á primeira.

Os números de Luckia

A compañía presidida por José González superou en 2024 por primeira vez os 600 millóns de ingresos. A compañía incrementou un 6% a súa cifra de negocios, ata os 603,2 millóns, mentres que o ebitda situouse nos 58,3 millóns, practicamente o mesmo que o do ano anterior.

En canto ao negocio en España, Luckia xerou uns ingresos de 124,1 millóns cos salóns de xogo e a actividade operadora en España, o que supón un incremento do 6,5% respecto ao ano anterior. Os casinos aportaron 23,6 millóns, un 12% máis, mentres que os bingos mantivéronse na mesma liña do 2023, con 26,6 millóns. Pola súa parte, a principal liña de negocio, que son os xogos de azar e apostas presenciais e en liña, ascendeu ata os 342,2 millóns, un 7,5% máis.