Acento galego para Baker McKenzie: ascende a Lois Caeiro a socio de dereito laboral

Baker McKenzie engade acento galego á súa cúpula. O despacho de avogados nomeou a Lois Caeiro novo socio da área de dereito laboral en España tras a promoción de 47 novos partners a nivel mundial.

Caeiro xa formaba parte da área de dereito laboral de Baker McKenzie desde 2009 e agora dá un novo salto que se fará efectivo o 1 de xullo. O executivo galego dá un paso máis no organigrama de Baker McKenzie, entidade para a que exerceu tanto desde as súas oficinas de Chicago e Londres como desde Madrid, onde desempeñou o cargo de xefe de equipo do departamento de emprego.

Lois Caeiro escala, deste xeito, posicións na oficina de Madrid ao facer valer a súa ampla experiencia no asesoramento a clientes nacionais e internacionais en todos os aspectos relacionados coa xestión estratéxica das relacións laborais. “Estamos encantados co nomeamento de Lois como novo socio de Baker McKenzie en España. A súa promoción reforza a solidez do noso equipo de Laboral, especialmente nun entorno marcado por unha crecente complexidade regulatoria e transformación do emprego. A súa experiencia e coñecemento do mercado serán clave para seguir acompañando aos nosos clientes nos seus retos laborais máis estratéxicos”, destacaron Rodrigo Ogea e Mireia Sabaté, socios codirectores de Baker McKenzie en Madrid e Barcelona, respectivamente.

Licenciado en Dereito e Relacións Internacionais e en Ciencias Políticas e da Administración pola Universidade Pontificia Comillas ICAI-ICADE, Caeiro compaxinará o seu novo cargo co de profesor colaborador no máster de acceso á avogacía na Universidade Carlos III de Madrid.

Esta labor docente levouno a ser previamente profesor do Máster en Dirección e Xestión do Capital Humano da Escola de Finanzas ou profesor practicum laboral na Universidade Pontificia Comillas ICAI-ICADE.