Adolfo Domínguez deixará de comunicar os seus resultados do primeiro e terceiro trimestre tras unha «reflexión estratéxica»

Adolfo Domínguez decidiu reducir os informes de resultados que comunica á CNMV e, polo tanto, tamén aos investidores e accionistas. A téxtil ourensá, dirixida por Adriana Domínguez, sinala que se limitará a informar sobre os balances do primeiro semestre e o anual. Deste xeito, xa non remitirá o informe correspondente ao primeiro trimestre de 2026, nin tampouco o do terceiro trimestre.

Nun comunicado, a compañía explica que esta decisión prodúcese tras unha “reflexión estratéxica” do consello de administración sobre o modelo de comunicación financeira da Sociedade, en liña co marco regulatorio e a práctica de mercado observada. “O consello considera que este novo modelo favorece unha visión máis estrutural da evolución do negocio, e contribúe a unha asignación máis eficiente dos recursos internos dedicados á elaboración e verificación da información financeira periódica”, argumenta.

Adolfo Domínguez ten unha capitalización en bolsa moi baixa, de 58 millóns, e as accións revalorizaron un 20% no que vai de ano. O ano pasado alcanzou os 139 millóns de ingresos, un 2% máis, e un beneficio neto de 1,64 millóns.