Altri fai balance: máis de 17 millóns investidos e perdas de 8 millóns desde que iniciou o proxecto de Palas

Altri fai contas e, por agora, non saen. O proceso de investimento nas plantas de celulosa e fibras téxtiles de Palas de Rei, por momentos tortuoso no plano administrativo e político, cumpre os seus particulares xalóns en canto ao desenvolvemento do proxecto. En síntese, máis de 17 millóns investidos e perdas de case 8 millóns desde que iniciou o proxecto de Palas. Greenfiber, a filial do grupo luso, declara uns números vermellos de case 3 millóns en 2024, ano no que presentou fondo de manobra negativo. As achegas de socios acumuladas nestes tres anos, contando con Smarttia, o seu aliado: 23,6 millóns de euros.

Así se desprende da conta de resultados e do balance aprobados polo consello da compañía a finais de marzo, que son as propias dunha empresa creada como vehículo investidor, que está arrancando coas achegas dos seus socios, os seus recursos, o seu inmobilizado e o fondo de manobra, que ven a reflectir a capacidade dunha empresa para cubrir as súas obrigas de pago a curto prazo. Desde a súa creación e primeiro ano de actividade, o 2022, Greenfiber acumula números vermellos por 7,7 millóns. O ano pasado foron 2,8 millóns de perdas os que anotou, que se viñeron a sumar aos 3,17 millóns en negativo de 2023. Un ano antes, en 2022, en total o resultado negativo apuntado fóra de 1,7 millóns.

O proxecto e o proceso

Unha vez que conta co OK ambiental da Xunta, a pastera lusa está á espera dos fondos públicos para levantar o complexo de Palas, que pasa por unha celulosa e unha planta de fibras téxtiles, dúas fábricas nunha. A inversión prevista xa vai ata os mil millóns de euros, para os que a cotizada lusa esixe uns 200 millóns de fondos públicos. É Madrid agora, a través dos axustes nos Pertes e os Next Generation, quen ten o balón no seu campo.

Mentres, os socios de Greenfiber (Altri controla o 75% do capital, e Smarttia, do dono de Greenalia, o 25% restante) aprobaron en marzo unhas contas nas que se reflicte que as achegas de socios acumuladas van xa aos 17,7 millóns para o grupo luso e 5,9 millóns a compañía renovable galega. En 2024 non se realizaron novas achegas máis aló do desembolso conxunto do exercicio precedente, uns 14,1 millóns.

O inmobilizado de Greenfiber

É no balance de Greenfiber, polo lado do activo, onde se pode constatar o esforzo investidor destes tres anos. O inmobilizado material, é dicir, os elementos patrimoniais tanxibles e bens que se utilizarán na actividade permanente e produtiva da empresa, sitúase ao peche de 2024 en 17,7 millóns de euros. Ese é o importe que Greenfiber di que “activou nos últimos anos relacionados coa unidade industrial para a produción de polpa e fibras téxtiles sostibles ao considerar que se cumprían os criterios contables para os mesmos tales como a existencia dun proxecto específico, sendo os custos directamente atribuíbles, e existencia dunha rendibilidade económico comercial razoablemente asegurada”, explican os administradores de Greenfiber.

Poucas referencias ás trabas actuais, aínda que o grupo desliza algún mensaxe na memoria. “A pesar das incertidumbres asociadas ao proxecto relacionadas co desenvolvemento lexislativo do mesmo”, sinalan, “os administradores consideran que o bo fin do proxecto atópase razoablemente asegurado e que conta co compromiso dos seus accionistas, así como os medios técnicos, financeiros e humanos para levalo a cabo”.

Fondo de manobra negativo

Outra das mudanzas substanciais derivado da investimento é o fondo de manobra de Greenfiber, que pasou a negativo o ano pasado. Este elemento é clave, ao mostrar a capacidade que ten unha empresa para poder cumprir coas súas pagas e obrigas a curto prazo. No caso de Greenfiber, deixa claro que a compañía conta co apoio financeiro da súa matriz, Altri, pero admite que ao peche de 2024 o fondo de manobra era negativo en medio millón de euros, mentres que un ano antes era positivo en 4,1 millóns. É dicir, deu a volta. A compañía atribúe esta circunstancia a “responsabilidades contractuais actuais, só esixibles no futuro”, sen ofrecer máis detalles.