Altri lamenta as protestas contra o proxecto de Palas e reivindica o aval de Bruxelas.
A multinacional defende que o proxecto acaba de conseguir o selo STEP outorgado pola Comisión Europea, "recoñecemento ás iniciativas industriais que contribúen aos obxectivos estratéxicos da UE".
Recreación da fábrica de Altri de pasta celulósica e fibras téxtiles proxectada para Palas de Rei. Greenfiber
Comentarios
Greenfiber, a sociedade da papeleira portuguesa e a enerxética Greenalia, lamenta que unha parte da sociedade “siga tendo unha percepción negativa do proxecto que deseñamos para Palas de Rei”, en relación á multitudinaria protesta que tivo lugar este domingo en Santiago contra o proxecto.
A compañía explicou nun comunicado que a iniciativa acaba de recibir o sello STEP outorgado pola Comisión Europea, “un recoñecemento reservado a aquelas iniciativas industriais que contribúen de forma destacada aos obxectivos estratéxicos da Unión Europea en materia industrial, tecnolóxica e medioambiental”.
“Concretamente, a Axencia Executiva Europea de Clima, Infraestruturas e Medio Ambiente (CINEA) valorou positivamente todos os aspectos analizados do proxecto GAMA, destacando como sobranceiro a súa capacidade de evitar emisións de gases de efecto invernadoiro e cualificando como notables o seu grao de innovación, madurez e eficiencia de custos”.
Segundo sosteñen desde a compañía, este feito vén a refrendar que se trata de “un proxecto serio, rigoroso, sostible e innovador que, ademais de dar resposta á necesidade do sector téxtil de obter fibras 100% biodegradables, contribuirá a poñer en valor o monte galego”.
Nesta liña, destacaron que seguirán “explicando o proxecto a todos aqueles colectivos que desexen informarse e traballando para que Galicia sexa a alternativa de Europa ás fibras téxtiles sintéticas”.
