Avantespacia, promotora da familia Jove, impulsa un novo proxecto de 43 vivendas en Sanxenxo.

Avantespacia, a promotora da familia Jove, iniciou a comercialización da promoción Dornas de Sanxenxo, que ten previsto construír a 400 metros da praia de Silgar, en pleno casco urbano e a só uns minutos do Real Club Náutico e que incluirá un total de 43 vivendas, con unha praza de aparcadoiro por cada unha delas. Tamén incluirá outras 46 prazas de estacionamento adicionais, non vinculadas ás vivendas.

Segundo explica a compañía nunha nota de prensa, o proxecto articúlase en dous bloques diferenciados, de 14 e 29 vivendas, respectivamente, cun deseño e arquitectura que se integra de forma respectuosa no seu contorno, ao tempo que concede “especial relevancia á funcionalidade e confort dos espazos”.

Serán pisos de 1, 2 e 3 dormitorios, con cociñas totalmente equipadas (frigorífico combi integrable, lavalouzas integrable, placa de indución, forno eléctrico, microondas e campá extractora integrada), baños alicatados con cerámica de primeira calidade, pavimentos con gres porcelánico gran formato -tamén nas terrazas exteriores e no solárium-, habitacións con armarios empotrados modulares e porta de entrada blindada. Ademais, o complexo Dornas de Sanxenxo disporá doutros servizos extra, como unha zona de paquetería dixital.

“Para a comercialización deste novo proxecto, Avantespacia dispón dunha oficina comercial, situada na rúa Luis Vidal Rocha, número 4, baixo. Todas as persoas interesadas poden recibir a información que precisen sobre esta nova promoción na que se prima a sustentabilidade e a eficiencia enerxética para gañar en calidade de vida, cun compromiso real e efectivo co medio ambiente”, explican desde a compañía.

Características dos novos inmobles de Avantespacia

A promotora destaca entre as vantaxes da nova promoción o aforro enerxético grazas aos paneis fotovoltaicos na cuberta; o seu sistema de calefacción mediante solo radiante, que tamén permite aumentar o espazo útil da vivenda ante a ausencia de radiadores; ou a instalación de aire acondicionado individual e conectable á unidade interior de aerotermia.

Tamén destacan desde a promotora as “mellores orientacións, vistas e control térmico” dos inmobles para favorecer a iluminación natural nos espazos; os illamentos térmicos e acústicos; o consumo de auga sostible; ou os servizos para fomentar a mobilidade sostible, con “fáceis accesos e a mellora ambiental dos espazos comunitarios”.

“Desde a súa constitución en 2016, Avantespacia mantivo un crecemento sostido, logrando implantarse xa na práctica totalidade do territorio nacional a través de seis delegacións. A compañía centra a súa liña de negocio no segmento medio e medio-alto en zonas prémium das principais capitais españolas, primeira e segunda residencia. Os seus proxectos destacan polo deseño, a calidade integral aplicada a todo o ciclo de vida do produto e pola sustentabilidade e a eficiencia enerxética”.