Un banqueiro por outro en Inditex: José Ignacio Goirigolzarri releva a Rodrigo Echenique no consello
O consello de Inditex proporá á xunta xeral a incorporación do expresidente de Caixabank e de Bankia como conselleiro independente en substitución do histórico executivo do Banco Santander.
José Ignacio Gorigolzarri releva a Rodrigo Echenique en el consejo de administración de Inditex. Fotos de archivo de Europa Press
Comentarios
Ao Amancio Ortega sempre lle gustou ter bancarios á mesa. Polo menos, na do seu consello de administración. Juan Manuel Urgoiti, Francisco Luzón, Emilio Saracho, Rodrigo Echenique… Chega agora o turno da despedida para o histórico executivo do Santander, noutro tempo man dereita de Emilio Botín e actualmente ás ordes da súa filla Ana Patricia.
O consello de administración da compañía acordou que o próximo 7 de xullo se celebre a xunta xeral ordinaria da compañía. Nela farase efectiva a saída de Rodrigo Echenique Gordillo, que deixará o consello ao concluír o prazo de duración do seu mandato o día 12 de xullo. O consello proporá o nomeamento de José Ignacio Goirigolzarri Tellaeche como conselleiro independente.
“Goiri” por Echenique
Goirigolzarri é outro histórico das finanzas patrias. Foi presidente de Caixabank entre 2021 e 2024. Liderou como presidente executivo a fusión por absorción de Bankia por parte de Caixabank, consolidando o grupo como o maior banco no mercado español. A súa saída fíxose efectiva en 2025, e foi substituído por Tomás Muniesa. Entre 2012 e 2021 asumira a presidencia de Bankia nun momento crítico de rescate financeiro, cando a entidade madrileña fora nacionalizada. Con anterioridade, a traxectoria de “Goiri” sempre estivera vinculada ao BBVA, do que chegou a ser conselleiro delegado.
A saída de Echenique de Inditex é en certa medida a despedida da presenza física do Banco Santander no consello da compañía de Ortega, na que durante anos estivo sentado outro executivo fiel a Emilio Botín. Tratábase de Francisco Luzón, xa falecido e nos anos noventa presidente de Argentaria.
Echenique é un nome propio das finanzas españolas desde a época de Mario Conde en Banesto. Incorporárase ao consello do Santander en 1988. Exercera como conselleiro delegado entre 1988 e 1994, e posteriormente asumira a vicepresidencia executiva. Echenique liderou operacións como a integración de Banesto e a absorción do Banco Popular, do que foi presidente. Ademais de Inditex, Echenique foi membro de consellos como Vocento, NH Hoteles, Vallehermoso ou Ebro Alimentación.
