O centro tecnolóxico Gradiante crece e supera os 17 millóns en ingresos, un 20% máis

O centro tecnolóxico Gradiant pechou 2025 con resultados récord, acadando por primeira vez os 17 millóns de ingresos. Visto en perspectiva, supón un incremento do 20% respecto ao exercicio anterior e do 183% en comparación con 2021. Deste volume de negocio, o 66% correspondeu a facturación vinculada a empresas que contaron con Gradiant como socio tecnolóxico.

Ademais, o centro conseguiu contratos de I+D por valor de 6,4 millóns de euros, cunha destacada achega da financiación europea, que alcanzou os 4,4 millóns de euros, un 124 % máis que no exercicio anterior. Desde a súa fundación en 2008, o centro acumula máis de 19 millóns de euros procedentes de programas europeos de financiación competitiva, segundo trasladou nun comunicado.

Desenvolvemento de proxectos

Durante o último exercicio, o centro desenvolveu un total de 123 proxectos, dos cales 81 foron nacionais, 23 impulsados en Galicia e 19 de carácter internacional. “En Gradiant consolidamos un modelo de éxito sólido baseado non só en atraer financiamento para I+D+i, senón en transformalo en tecnoloxías innovadoras que teñen un impacto tangible na economía e xeran emprego de alto valor engadido. A nosa capacidade de anticiparnos aos retos da industria, desenvolver tecnoloxía propia e manter un elevado nivel de especialización son as claves do noso éxito. Un éxito que, ademais, contribúe a reforzar a competitividade e capacidade innovadora de todo o noso contorno”, destaca Luis Pérez Freire, director xeral de Gradiant.

Outro dos eixes estratéxicos é o impulso de startups intensivas en I+D. Durante 2025, Gradiant lanzou dúas novas spin-offs baseadas en intelixencia artificial, KIUR e DOKKEN, que se suman a proxectos impulsados polo centro que agora xa están consolidados como é o caso de Alice Biometrics, especializada en verificación de identidade dixital, ou Sense Aeronautics, centrada en mellorar a eficiencia e seguridade en operacións aéreas e espaciais.

Ademais, o centro presentou QRYPTION, un novo proxecto de criptografía financeira avanzada orientado a reforzar a protección e xestión segura de activos criptográficos en entidades financeiras, e que aspira a converterse na sexta spin-off impulsada pola organización.

Un fondo pioneiro

O 2025 foi tamén o ano da creación de TRL13, o primeiro fondo europeo de investimento promovido por un centro tecnolóxico español con capital propio, un instrumento pioneiro que combina tres áreas estratéxicas: deep tech, transferencia tecnolóxica e tecnoloxías dixitais.

“Con TRL13 damos un paso máis no noso propósito de xerar riqueza a través do coñecemento, poñendo o noso propio capital e experiencia ao servizo de novos proxectos tecnolóxicos para multiplicar o impacto económico, social e industrial que somos capaces de xerar”, explica Luis Pérez Freire.