Un ciberataque a Naturgy expón os datos dun 3% dos seus clientes

Como lle sucedeu a Inditex, Naturgy tamén foi vítima dun ciberataque, aínda que non de maneira directa. A compañía de Francisco Reynés comunicou “un acceso non autorizado” á base de datos dun dos seus provedores, que contén información identificativa, contractual e bancaria. A filtración podería afectar ao 3% dos clientes comercializados pola multinacional en España.

O grupo herdeiro de Unión Fenosa explica que comunicou o incidente “con celeridade” á Asociación Española de Protección de Datos (AEPD), ás forzas de seguridade e aos clientes afectados. Tamén trasladou aos clientes recomendacións e medidas en materia de seguridade. A compañía garantiu, non obstante, que entre os datos filtrados “non se inclúe información relacionada con contrasinais nin credenciais de acceso á Área Cliente de Naturgy”.

Sen incidencia nas operacións

Naturgy activou, en coordinación coas autoridades competentes e o provedor afectado, o seu protocolo de resposta ante este tipo de incidentes e asegura ter tomado as medidas necesarias para protexer a seguridade dos datos dos seus clientes.

A compañía destacou, non obstante, a existencia dunha brecha de seguridade nos seus sistemas e descartou que a filtración proceda da súa plataforma comercial. Segundo as primeiras conclusións, o incidente non ten “ningún tipo de afectación sobre a operativa da compañía“.

O grupo enerxético reforzou as súas medidas de seguridade e implantou outras correctoras adicionais, como a renovación de credenciais, bloqueos de accesos e auditorías técnicas de seguridade. Ademais, levou a cabo unha auditoría sobre os sistemas do provedor afectado para esclarecer as causas do incidente.