Competencia dá o visto bo a Alsa para operar os trens turísticos en Galicia
A Comisión Nacional dos Mercados e a Competencia non ve competencia entre os servizos ofrecidos polo xigante dos Cosmen e os de Renfe, polo que non se ve “comprometido” o equilibrio económico do contrato.
Autocarro de Alsa. Alsa
Comentarios
A Comisión Nacional dos Mercados e da Competencia (CNMC) considera que Alsa, o xigante dos Cosmen, pode prestar novos servizos de tren turístico en Galicia xa que “non compiten” cos ofrecidos por Renfe e “non comprometen” o equilibrio económico do contrato de servizos públicos 2018-2027 entre o Ministerio de Transportes e Mobilidade Sostible e Renfe Viaxeiros.
Segundo informou a CNMC nun comunicado, Alsa solicitou prestar cinco frecuencias por sentido que coinciden cos servizos públicos de media distancia da rede convencional. Concretamente nos traxectos de: Ourense – Barra de Miño – Os Peares – San Estevo de Sil – Canaval – Monforte de Lemos; e Monforte de Lemos – San Coludio-Quiroga – Montefurado – A Rúa-Petín.
Neste sentido, a CNMC indica que os servizos turísticos de Alsa e os servizos públicos de Renfe “non compiten entre si”, xa que os de Alsa circulan con trens históricos e só operan no verán.
Así mesmo, destaca que os prezos de Alsa son “entre tres e sete veces máis caros” que os dos servizos públicos.
