Que di o sector agrario das primeiras semanas da aplicación do acordo do Mercosur?

O acordo de Mercosur leva xa as súas primeiras semanas de aplicación e entre os sindicatos agrarios hai disparidade de opinións sobre os seus efectos. Unións Agrarias (UU.AA.) e Asociación Agraria de Galicia (Asaga) aplauden o reforzo do control durante as primeiras semanas de aplicación provisional do acordo comercial entre a Unión Europea e Mercosur.

A pesar de que ambas centrais consideran que “aínda é cedo” para facer unha valoración global –entrou en vigor de xeito provisional o pasado 1 de maio–, feitos como o que afectan á carne de Brasil “demostran”, ao seu xuízo, “que se están a reforzar as medidas de control”.

O caso da carne de vacún

E é que a Comisión Europea suspenderá desde o 3 de setembro as importacións de carne de vacún de Brasil ao considerar que non garante o cumprimento das normas sanitarias europeas sobre o uso de antimicrobianos e algunhas substancias.

Frente a esta opinión, Sindicato Labrego Galego (SLG), que segue en contra do tratado, non cre que as cláusulas de salvagarda contempladas no regulamento sirvan para “protexer” ao sector galego.

Denuncia do Sindicato Labrego

De feito, esta central solicita tanto á Xunta como ao Goberno central que insten á Comisión Europea a iniciar unha investigación ante a baixada do prezo que, asegura, “xa se está a constatar no vacún de carne” e no caso galego é “especialmente forte” dentro da carne amparada pola IXP Vaca e Boi de Galicia.

En febreiro, a Xunta asinou con UU.AA. e Asaga unha declaración con “exixencias e compromisos” fronte a Mercosur. Ao respecto, o Executivo autonómico asegura que o Observatorio de Prezos “está na recta final” –o compromiso era que estivese listo no primeiro semestre–.

Observatorio de prezos da Xunta

“No reforzo da promoción do produto galego tamén se está a traballar”, aseguran fontes da Consellería do Medio Rural consultadas por Europa Press.

A declaración tamén recollía numerosas peticións ao Goberno central e á Unión Europea que o departamento de María José Gómez xa trasladou formalmente, segundo indica.

En todo caso, as fontes da consellería indican que o que non coñecen son “os pasos que se están a dar” desde o Ministerio de Agricultura.

“Escenario inicial”

En declaracións a Europa Press, o secretario xeral de UU.AA., Roberto García, apunta que “por agora” non hai “novidades relevantes” sobre a aplicación práctica do acordo con Mercosur “no que poida afectar directamente” aos sectores produtores galegos.

“Hai que ter en conta que estamos nun escenario aínda inicial e que existe moita cautela á hora de avaliar posibles impactos reais no mercado”, advirte.

En todo caso, asegura estar “a facer seguimento da situación” a través das súas organizacións e asociados, “tanto en Galicia como no conxunto do Estado a través de UPA, con especial atención aos sectores cárnico e lácteo”.

“Se se detectase calquera alteración de mercado ou posible incumprimento, trasladaríamoso á Xunta e ao ministerio para que, polos cauces establecidos, se poida elevar a Bruxelas coa documentación técnica correspondente”, resalta.

Por outra banda, fontes de Asaga manifestan a súa “satisfacción” por noticias como a da carne de Brasil e inciden, igualmente, en que “é cedo aínda” para detectar eventuais efectos no mercado galego.