Escribano ficha á ex CEO do Grupo Puentes, Purificación Torreblanca

• Copasa, San José e Puentes, as tres maiores construtoras galegas, superan os 9.000 millóns en contratos
• O éxito de Grupo Puentes en Ecuador leva a estafadores a usar o seu nome nunha trama de ofertas laborais falsas

Escribano Mechanical Engineering (EM&E) incorpora como conselleira independente a Purificación Torreblanca, que foi ata xaneiro deste ano CEO de Puentes, grupo construtor con sede en Oroso e controlado polo xigante China Road and Bridge Corporation, cargo que ocupaba desde 2019. 

Xunto a Torreblanca entra tamén como conselleiro independente na firma dos irmáns Escribano Antonio Gómez Ciria, é conselleiro de Mapfre e de Red Eléctrica, e formou parte da directiva do grupo FCC e do consello de Hispasat, que agora forma parte do grupo Indra.

Con estes dous nomeamentos renóvase o consello da compañía que reelexe a Javier Escribano como presidente e Marta Ortiz Hinojar, esposa de Ángel Escribano, como vicepresidenta. Pola súa banda, Ángel Escribano recupera o cargo de apoderado en Zalip Corporation, firma do grupo, controlada pola matriz, Advanced Engineering and Manufacturing.

A saída de Torreblanca do Grupo Puentes

Ao inicio de xaneiro Purificación Torreblanca presentaba a súa dimisión por “motivos persoais” da construtora. Desde a compañía agradecían o seu “liderado, esforzo e firme compromiso” ao longo dos sete anos na compañía, xa que a súa “visión estratéxica, o seu impulso e a súa capacidade para fortalecer a cultura do Grupo Puentes foron fundamentais para posicionar a nosa organización no lugar que ocupa hoxe”. 

Durante esta etapa, explicaban desde a compañía, o tándem formado por Purificación Torreblanca e Marco Antonio Hermida conseguiu multiplicar por 3,8 a cifra de negocios do Grupo Puentes, tras pasar de 115 millóns de euros de ingresos en 2020 a 435 millóns de euros en 2024, consolidando a carteira de negocio para os próximos anos.

Tras a saída de Torreblanca, Marco Antonio Hermida, director de operacións e con máis de 25 anos de traxectoria no Grupo Puentes, asumirá as súas funcións. Ademais, di a compañía, constituíuse un comité asesor de transición para garantir a “continuidad, a estabilidade e un liderado eficaz” da compañía ata a selección do novo director xeral.