Falece Benito Blanco, o galego que emigrara a Arxentina, reinou co seu petróleo e fundou Poligal
O empresario lalinense faleceu aos 94 anos e será enterrado este xoves no cemiterio de Chacarita da capital arxentina.
Imaxe de arquivo de Benito Blanco durante unha entrevista / Federación de Sociedades Españolas de Arxentina
Comentarios
Galicia perde un dos seus referentes na diáspora. Benito Blanco faleceu en Bos Aires aos 94 anos de idade. O empresario nacido en Lalín en agosto de 1931 será enterrado este xoves no cemiterio de Chacarita da capital arxentina, na que recalou en xaneiro de 1952.
Benito Blanco emigrara ao país sudamericano con apenas 20 anos de idade tras aforrar previamente 52.000 pesetas. Tras pasar polo sector da hostalaría e crear unha axencia de tramitacións con Genaro Longueira, o empresario lalinense faría a súa incursión en sectores como o mineiro ou o petrolífero. O seu primeiro paso foi a adquisición dunha parte dunha empresa mineira na provincia de Río Negro dedicada á extracción de bentonita, un mineral do que se convertería no seu principal produtor en solo arxentino a partir do ano 1972 tras vender máis de 3.000 toneladas anuais.
O empresario galego reinaría tamén no sector petrolífero co seu xacemento en Plaza Huincul, onde chegou a despregar oito equipos de perforación, catro laboratorios móbiles e medio cento de traballadores.
Pero ademais de erguer este imperio en Arxentina, Benito Blanco nunca perdeu de vista a súa Galicia natal. É por iso que o empresario lalinense foi un dos impulsores de Poligal, que no seu día chegou a ser desde o seu centro de Narón o único fabricante de propileno de toda España, pero que pechou en 2019.
Benito Blanco, tras ser invitado ao Parlamento Europeo como presidente do Club Europeo de Arxentina. Mariana Vicat
“O meu único desexo era que houbese traballo e prosperidade na miña terra nai”, lembraba Benito Blanco nunha entrevista con Economía Digital Galicia en 2019, na que cifraba en “18 millóns de dólares” o investimento inicial. Naquela conversa, o por aquel entón presidente da Federación de Sociedades Españolas da República Arxentina declaraba sentirse “moi mal” pola crise que atravesaba a compañía, que xa estaba en mans do Grupo Peralada.
Benito Blanco controlaba o 25% desta empresa “pioneira” que puxo en marcha xunto ao seu socio Florencio Aldrey. “Soubemos que España importaba polietileno de Alemaña e quixemos que se autoabastecese”, lembraba Blanco. “Cando vendemos a nosa participación á empresa íalle tan ben que se ampliou e chegou a prover polietileno non só a España senón tamén a Alemaña”, poñía en valor.
O labor social de Benito Blanco
Ademais desta faceta empresarial, Benito Blanco tamén se involucró na vida social do seu país de orixe. É por iso que foi responsable da comisión de festas da Falla Valenciana El Turia en 1964 e ocupou diferentes cargos no Centro Lalín de Bos Aires, o Club Español de Bos Aires, o Club Europeo e a Federación de Sociedades Españolas da República Arxentina.
Este cargo valeulle para formar parte da comitiva de 40 delegados das colectividades emigrantes asentadas en Arxentina que mantiveron un encontro co Papa Francisco no Vaticano.
Benito Blanco financiou a construción de 120 vivendas na súa Lalín natal, concello do que é Fillo Predilecto, e recibiu a Orde do Mérito Civil, a Orde de Isabel a Católica e o diploma e a medalla da Orde da Vieira.
