O gran provedor de xeados de Mercadona ficha como CEO ao antigo ‘xefe’ de Lactalis en España

Ignacio Elola, quen fora conselleiro delegado de Lactalis Iberia entre 2019 e 2024, é o novo CEO de Grupo Alacant, o gran provedor de xeados de Mercadona e a compañía que comercializa a marca Antiu Xixona. O directivo, tamén expresidente da patronal láctea Fenil, anunciou a través da súa conta de Linkedin a súa saída da multinacional francesa tras unha traxectoria de 15 anos onde ocupou postos de alta responsabilidade, ata converterse no director comercial global do grupo que produce marcas como Puleva, El Ventero, Gran Capitán, Ram ou Flor de Esgueva.

A marcha de Elola tiña como destino a Comunidade Valenciana. A publicación especializada Food Retail avanzou a fichaxe polo fabricante de xeados de Mercadona como novo CEO. Alacant está controlado polo fondo italiano Investindustrial e apunta aos 300 millóns de ingresos anuais tras a adquisición de Silver Dairy, un dos principais grupos xeadeiros de Irlanda.

Segundo a publicación, o obxectivo de Elola será profundar na profesionalización da xestión e acelerar o crecemento dunha empresa en pleno proceso de expansión.

Licenciado en Empresariais por Esade e Máster en Dirección de Empresas outorgado na mesma institución, Elola deixou a dirección de Lactalis Iberia, a división que controla as plantas de Vilalba e Nadela, e a presidencia de Fenil para ascender á dirección comercial global da compañía, que facturou 31.200 millóns en 2025 e xerou uns beneficios de 528 millóns.