Grupo Nosa Terra, propietaria de Elcano, loita con Facenda por deducións de impostos de Povisa tras vender o hospital

Grupo Nosa Terra 21 é unha das maiores compañías galegas por volume de ingresos, cunha cifra de negocio que ronda os 1.000 millóns anuais e que se constrúe en base á actividade da navieira Elcano e de Remolcanosa. No grupo da familia Silveira estivo tamén Povisa, o maior hospital privado de Galicia, que tras encadear exercicios en perdas e un preconcurso de acredores, foi vendido a Ribera Salud. Aquela operación marcou o inicio da expansión da empresa de orixe valenciano polo sistema sanitario galego, onde mercaría máis tarde o Polusa de Lugo e o Juan Cardona de Ferrol; e constatou o problema que representaba o concerto que asinou Povisa co Sergas en 2014 e que deparou unha cascada de números vermellos para o hospital.

Coa venda, Nosa Terra 21 quitouse un problema grave de enriba, pero outros novos, máis coxunturais e de índole fiscal, asomaron pola porta. A dona de Elcano levou primeiro ao TEAC e logo ao Tribunal Superior de Xustiza de Galicia a liquidación do Imposto de Sociedades do exercicio de 2019, que se viu engrosada en case un millón de euros pola transacción con Ribera Salud. Na pugna logrou algo notable: que os inspectores e altos funcionarios de Facenda lle deran a razón e recoñecesen erros en liquidacións pasadas de impostos; e que, ao mesmo tempo, iso non servise de nada á hora de diminuír a factura fiscal presente, pois o pasado, pasado está.

O grupo fundado por José Silveira Cañizares, falecido en 2023, recorreu ante o Tribunal Superior de Xustiza de Galicia para tentar minorar a base impoñible do Imposto de Sociedades do exercicio de 2019 en 908.000 euros. A disputa é moi técnica e parte da cualificación de determinados ingresos por servizos prestados intragrupo, neste caso, os da filial inmobiliaria Nosa Terra 2000 ao hospital privado. A compañía pretendía que eses ingresos se considerasen participación en beneficios e así acollerse á exención prevista na Lei do Imposto sobre Sociedades para dividendos e rendas derivadas da transmisión de valores representativos dos fondos propios.