Grupo Puentes, primeira construtora en certificar o seu sistema de intelixencia artificial.

Grupo Puentes da un paso máis. A compañía galega converteuse na primeira construtora en respaldar a súa xestión ética e segura dos sistemas de Intelixencia Artificial coa consecución da certificación ISO/IEC 42001.

A firma, que ten ao xigante China Road and Bridge Corporation como máximo accionista, obtivo na sede de Aenor tanto esta certificación como a ISO 31000, para a xestión do risco corporativo; e a ISO 50001, para a xestión enerxética. “Estas certificacións reforzan o compromiso da compañía coa eficiencia, a sostibilidade e o bo goberno”, destaca a compañía con sede en Sigüeiro.

Purificación Torreblanca, CEO do Grupo Puentes, destacou que estas tres novas certificacións son “un fito máis no esforzo do Grupo Puentes por alcanzar a excelencia no negocio e avanzar na mellora continua en bo goberno e no compromiso co entorno”. “Traballamos para construír as infraestruturas do futuro, pero iso só é posible a través dun modelo que se transforma día a día cunha xestión ética e responsable dentro dun marco dixital e sostible”, apuntou.

Torreblanca participou nun acto na sede de Aenor xunto ao CEO desta última, Rafael García Meiro. “É unha marabillosa noticia para a
sociedade que un sector estratéxico como a construción conte con empresas que traten de innovar e de estar á vangarda, comprometidas coas boas prácticas e dunha forma ética. Algo que, sen dúbida, demostra Grupo Puentes sendo a primeira compañía do sector en obter a ISO/IEC 42001 de xestión da IA, da man de AENOR. A compañía, ademais, manda unha mensaxe de máxima confianza aos seus grupos
de interese coa obtención das outras dúas certificacións, que fan aínda máis grande o fito mencionado”, recalcou o executivo.

As certificacións de Grupo Puentes

E é que Grupo Puentes converteuse na primeira compañía do sector da construción en España en certificar o seu sistema de xestión da IA e demostra así o seu compromiso co uso seguro e responsable destas ferramentas, dentro da súa política de bo goberno corporativo e gobernanza.

“Este estándar ofrece un marco completo que garante que as organizacións desenvolvan, implementen e xestionen sistemas de IA de maneira responsable, fiable e transparente. Este referencial proporciona unha abordaxe sistemática e recoñecida para xestionar os riscos e oportunidades asociados co uso da intelixencia artificial, ademais de definir un conxunto de controis a aplicar e de ofrecer unha guía para a súa implementación” explica a firma.

Neste sentido, Grupo Puentes, que colleitou unha facturación récord de 434,6 millóns de euros en 2024, destaca que “dende a incorporación de China Road and Bridge Corporation (CRBC) como empresa matriz en 2020″, avanzou “de forma decidida cara a un modelo de xestión profesionalizado, ético e dixital”. “O SIG foi un elemento estrutural neste proceso de transformación e madurez organizativa”, precisa a empresa, que xa suma un total de 13 referenciais certificados por AENOR, que cubren todas as áreas críticas do negocio: calidade (ISO 9001), medioambiente (ISO 14001), seguridade viaria (ISO 39001), seguridade e saúde no traballo (ISO 45001), innovación (UNE 166002), BIM (ISO 19650), ciberseguridade (ISO/IEC 27001), responsabilidade social (IQNet SR10), compliance penal (UNE 19601), transformación dixital (UNE 0060), intelixencia artificial (ISO/IEC 42001), riscos (ISO 31000) e enerxía (ISO 50001).