As empresas galegas Igalia, Galvintec, Cinfo e Situm representarán a España no Mobile World Congress

Presenza galega no Pavillón de España na vindeira edición do Mobile World Congress (MWC). Red.es, ente público adscrito ao Ministerio de Transformación Dixital e Servizo Público, seleccionou 50 pemes tecnolóxicas para estar presentes neste pavillón, catro delas galegas.

En concreto, trátase da coruñesa Igalia (consultoría especializada no desenvolvemento de proxectos e solucións de código aberto); A viguesa Galvintec (crea solucións na nube para a xestión integral do comercio dixital); a coruñesa Cinfo (que ofrece sistemas automáticos de produción de televisión baseados na nube); e a compostelá Situm (que ofrece mapas interactivos en 3D para os visitantes en espazos grandes e complexos como aeroportos, centros comerciais, hospitais, centros de convencións e recintos de exposicións).

As 50 pemes poderán gozar dun servizo chave en man para ampliar as súas oportunidades de negocio e potenciar a súa visibilidade. Recibirán entradas para o MWC, un stand personalizado para mostrar os seus produtos e servizos, acceso a unha área de networking e salas de reunións e presenza en contidos promocionais.

Ademais, poderán beneficiarse das actividades organizadas por Red.es no marco do encontro, participando no programa das xornadas e visitas de delegacións empresariais.

Na edición de 2024 do Salón, o Pavillón de España acolleu a 10.000 visitantes presenciais e 7.000 en liña, e acolleu máis de 60 actividades, incluíndo conferencias con máis de 100 relatores e sesións de networking.