Ignacio Rivera (Estrella Galicia) deixa a presidencia do Instituto da Empresa Familiar tras dous anos

A Asemblea de Socios do Instituto da Empresa Familiar elixiu por unanimidade a Eloi Planes como novo presidente da institución. O nomeamento do tamén presidente de Fluidra, quen foi proposto o pasado mes de marzo pola xunta directiva, pon fin á etapa de dous anos de Ignacio Rivera á fronte da organización. O executivo galego expresou á súa saída do cargo o seu compromiso co Instituto da Empresa Familiar e a súa disposición para apoiar ao novo presidente.

“Comecei esta etapa con moita ilusión, aínda que tamén cun gran sentido da responsabilidade por representar a miles de empresas familiares de todo o país. Pude escoitar moitas historias de ilusións e superación, e puiden ver a diversidade e riqueza do noso territorio. Comprobei todo o que temos en común: unha forma de vivir a empresa e de mirar ao futuro. Tamén tiven a sorte de poder comprobar o compromiso e a preparación dos nosos mozos. As futuras xeracións da empresa familiar chegan con ganas, valentía e soños moi grandes. Da miña parte, neste tempo intentei aportar o meu gran de area para achegar a realidade da empresa familiar á sociedade española, poñendo o foco no noso impacto positivo e na nosa forma de coidar a orixe, ás persoas, aos nosos aliados e ao planeta. O Instituto da Empresa Familiar é un gran instrumento para defender os intereses das empresas familiares, que son os de España”, dixo o presidente executivo de Hijos de Rivera na súa conta de Linkedin.

O seu sucesor no posto, Eloi Planes, convértese no decimoséptimo presidente do Instituto por un período de dous anos non prorrogables, como estipulan os estatutos. A decisión tomouse no marco da súa Asemblea Xeral, celebrada na Fundació Joan Miró de Barcelona, nunha xornada marcada pola oferta das empresas familiares para achegar a súa visión a longo prazo para a solución dos retos aos que se enfrontan España e Europa no contexto actual. O acto contou coa clausura do conselleiro de Presidencia da Generalitat de Catalunya, Albert Dalmau.

Presidente coa mirada longa

Nas súas primeiras palabras como presidente, Planes agradeceu o labor levado a cabo por Ignacio Rivera durante o seu mandato e puxo en valor o traballo que o Instituto vén desenvolvendo desde hai anos en defensa da empresa familiar, así como o papel clave que estas compañías desempeñan no desenvolvemento económico, a cohesión social e a xeración de emprego en España. “Vivimos un momento esixente, no que moitas certezas que parecían sólidas están a cuestionarse e no que, ás veces, incluso parece que se estean a perder referencias e valores importantes”, apuntou o líder de Fluidra.

Neste contexto, Planes reivindicou o papel da empresa familiar como parte fundamental da solución pola súa capacidade de achegar “esa mirada máis a longo prazo, nun mundo cada vez máis acelerado, incerto e volátil”, destacando a súa capacidade para xerar estabilidade e aportar valor económico e social. Así mesmo, defendeu a necesidade dun “país e unha Europa que acompañen, que xeren confianza e que dean estabilidade, porque competir no mundo non depende só das empresas, senón tamén da fortaleza do entorno que as rodea”. “Hai cuestións esenciais que requiren grandes acordos como país, máis alá de ideoloxías ou ciclos políticos”, afirmou.

“A competitividade non é un concepto abstracto. É o que permite que as nosas empresas medren, xeren emprego e aporten valor”, engadiu Planes, quen insistiu en que, “se queremos competir en Europa e no mundo, necesitamos un país con visión a longo prazo, ambición e capacidade de executar”. “Os empresarios non somos o problema fronte aos retos actuais, senón unha parte fundamental da solución”, concluíu.