Ignacio Rivera (Estrella Galicia) desvela a súa folla de ruta: duplicar vendas e que case o 70% non proceda da cervexa

Fíos de Rivera, a compañía que produce e distribúe Estrella Galicia, aspira a duplicar a súa facturación ata os 2.000 millóns e que arredor do 66% das vendas non procedan da cervexa, “queremos que sexa doutra cousa, ou novos mercados internacionais ou novas categorías de produtos”. 

Así o apuntou este martes no evento “Diálogo: impacto positivo nas organizacións” organizado por CESUGA no Museo Estrella Galicia, unha conversa de 90 minutos que reuniu ao tamén presidente do Instituto da Empresa Familiar e a Pablo Junceda, director xeral do Sabadell Galego, moderado pola xornalista Leticia Chas. 

Segundo as contas de 2024, último exercicio fiscal dispoñible, o negocio da cervexa representou o 75% da súa cifra de negocio, uns 667 millóns dos 886 recadados ese ano. Rivera defendeu o modelo produtivo da compañía sinalando que na fábrica do polígono coruñés de A Grela, na actualidade poden producir “uns facer 500 millóns de litros de cervexa, se a fixésemos como outras compañías que a fan cun proceso moito máis rápido e madurando moito menos o produto poderiamos chegar a acadar os 1.200 millóns de litros”. 

O presidente de Fíos de Rivera sinalaba estes datos como exemplo da importancia de non renunciar aos propósitos que se marcan as compañías, no seu caso, ofrecer un produto de “a mellor calidade”. “Os números non se miran cando se toman as decisións, son a consecuencia das decisións que tomas. As empresas sen propósito non chegan lonxe. Cando unha organización ten un propósito e a xente respírao é moi fácil que as decisións que tomen vaian ben porque sempre levará o ADN dese propósito”. 

No caso da súa compañía, as decisións estiveron orientadas a conseguir ser “unha empresa diferente sempre pensando en ser a marca máis querida”. “Se mirase os números nunca tería feito unha fábrica en Morás”, apuntou. 

Ademais diso, tamén defendeu a idea de “impacto positivo” como un enfoque cultural e transversal dentro das organizacións ao sinalar que “o obxectivo é que todos os equipos pensen no impacto positivo cando toman decisións”. 

Coherencia entre crecemento e raíces

Rivera e Junceda abordaron nas súas intervencións o papel da empresa como motor de transformación, o vínculo entre economía e territorio así como o resto de integrar o propósito na estratexia corporativa para construír un impacto positivo máis alá da sustentabilidade entendida só en termos medioambientais.

Rivera puxo en valor a conexión da súa compañía co seu territorio de orixe e defendeu o valor de manter a coherencia entre crecemento e raíces. “Galicia é todo, a nivel persoal e empresarial. É onde naceu Estrella Galicia e Fíos de Rivera e onde continuará crecendo”. 

Por outra banda, Junceda puxo en valor algo que Galicia ten e outras comunidades perderon que é a presenza de empresas, como Fíos de Rivera, “que decidiron quedar aquí, manter os seus cuarteis xerais e ir facéndose grandes desde aquí”. “Cando deciden quedar aquí convértense nun tractor moi importante. Eu á economía galega véxoa cun potencial tremendo”. 

Empresa familiar 

Rivera tamén subliñou a singularidade da empresa familiar e destacou que o seu principal selo distintivo é a visión a longo prazo: “Facemos cousas non para velas agora senón para que as vexan as próximas xeracións. Esa visión a longo prazo faiche ver as cousas de forma diferente. Nós cando investimos non o facemos só para gañar diñeiro, senón para xerar impacto”. 

Tamén compartiu as conclusións dun informe elaborado xunto a McKinsey no que se sinala que as empresas familiares, en comparación coas do mercado continuo, amosan un desempeño superior en ámbitos clave vinculados ao impacto: emprego, menor rotación, maior investimento en formación, crecemento compartido con aliados e sustentabilidade.

Aos novos emprendedores, o executivo lanza unha mensaxe de optimismo e un consello para que consigan medrar: “ter fame”. “Cando chegamos nós á empresa –a cuarta xeración– collimos con 30 millóns de facturación e imos entregala –á quinta– en 2.000 millóns”. 

Bo momento da economía galega

O director do Sabadell Galego trasladou unha visión optimista sobre o momento que vive o tecido empresarial galego, apoiada en datos e na evolución dos seus sectores estratéxicos. “As empresas galegas medran e fanse máis competitivas; iso é un feito. O meu optimismo está baseado en datos, non en supostos”. 

Nesta liña, Junceda defendeu o papel do sistema financeiro e sinalou que desde a entidade apostan “por financiar calquera proxecto viable que aposte pola innovación, a sustentabilidade e a tecnoloxía”.

Tamén destacou o valor da financiación sostible, orientada a investimentos con criterios sociais e medioambientais, e situou como exemplos ámbitos como enerxías renovables, economía circular, mobilidade sostible ou bonos sostibles.

Sobre o rol social da banca, Junceda reivindicou a dimensión humana do servizo financeiro e a importancia da atención próxima, mesmo nun entorno de transformación dixital. “En 2026 cumprimos 13 anos desde a integración de Banco Galego, traballando por e para Galicia”, apuntou ademais de remarcar o compromiso con familias e empresas “sen esquecernos de ningún sector por pequeno que fose, con tecnoloxía, pero sen esquecernos das persoas”.