Inditex recupera todo o perdido na bolsa en 2026 co Ibex impulsado polo acordo entre EE UU e Irán
A acción da matriz de Zara achégase aos 57 euros e a súa capitalización bursátil volve superar a que presentaba a finais do ano pasado, antes do castigo dos investidores polo bloqueo de Ormuz.
Inditex cae na bolsa debido á falta de avances na resolución do conflito do Oriente Medio. Fotos: Europa Press
Comentarios
Inditex, a primeira empresa do Ibex por capitalización, achegase aos 57 euros impulsada, como boa parte do selectivo, polo acordo entre EE UU e Irán. Deste xeito, xunto coas subidas encadeadas nas últimas catro sesións, a multinacional téxtil consegue recuperar o perdido ao longo de 2026 no parqué, precisamente polas dúbidas dos investidores derivadas do contexto xeopolítico.
Na bolsa española, o Ibex moderou a súa euforia inicial na media sesión cun repunte do 1,28%, ata situarse por riba dos 19.000 puntos, pero co prezo do petróleo afundíndose por riba do 5% tras o anuncio do acordo de paz entre Estados Unidos e Irán que reabre o estreito de Ormuz.
Caída do prezo do petróleo
Neste contexto, o prezo do Brent baixaba un 5,13%, chegando a cotizar o barril de petróleo de referencia para Europa en 82,86 dólares na media sesión, mentres que o West Texas Intermediate (WTI), de referencia en EEUU, cotizaba sobre os 80,16 dólares, tras abaratarse un 5,56%.
A caída do prezo do petróleo nas primeiras horas deste luns prodúcese despois de que este domingo o presidente de EEUU, Donald Trump, anunciase que o acordo con Irán inclúe o levantamento inmediato do bloqueo do estreito de Ormuz.
Capitalización
Neste escenario, Inditex colocou a súa acción preto dos 57 euros. Ás tres da tarde deste luns, a acción intercámbiase a 56,8 euros. Se mantén o prezo, a capitalización bursátil da compañía quedaría en algo máis dos 177.000 millóns de euros, superando así a súa cotización de peche do exercicio 2025, co título en 56,34 euros e unha capitalización de máis de 175.600 millóns.
Así, os valores que máis subían na media sesión eran Fluidra (+3,30%), Banco Santander (+3,19%), Amadeus (+3,18%), IAG (+2,69%) e BBVA (+2,59%). Do seu lado, Repsol encabezaba os descensos (-3,57%), seguido de Enagás (-1,40%), Puig (-1,27%), Endesa (-1,23%) e Solaria (-1,15%).
O resto dos principais parqués europeos reaccionaban con subidas importantes na media sesión: o británico FTSE 100 avanzaba un 0,15%, o francés Cac 40 un 1,02%, o alemán Dax un 1,15%, o italiano FTSE MIB un 0,67% e o Euro Stoxx 50 repuntaba un 0,99%.
Así mesmo, os efectos destes anuncios de paz en Oriente Próximo levaron ás Bolsas asiáticas a apuntarse fortes ascensos. O índice Shenzhen chinés subiu case un 4%, mentres que o Nikkei xaponés e o Kospi surcoreano gañaron máis dun 5%.
