Leite Celta e a ‘crise da manteiga’: as vendas caeron un 45% o ano pasado

Leite Celta, o grupo dirixido por Javier Bretón e en mans da portuguesa Lactogal, pechou o pasado exercicio 2025 cun retroceso nas vendas e beneficio neto, aínda que é certo que os resultados continuaron sendo sólidos. A compañía con plantas en Pontedeume (A Coruña), Ávila e Cantabria, viu como a súa cifra de negocio se minoraba un 2%, ata os 295 millóns de euros, mentres que o resultado neto facíao un 18%, ata os 7,2 millóns de euros. E nesta evolución xogou un papel clave a manteiga e a caída da demanda a partir da segunda metade do pasado exercicio.

Así o apuntan os administradores de Leite Celta na súa última memoria anual remitida ao Rexistro Mercantil. No informe de xestión do grupo, consultado por Economía Dixital Galicia a través da base de datos einforma.com, indican que a evolución dos seus números o pasado exercicio “explícase, fundamentalmente, polo encarecemento da materia prima e pola debilidade do mercado da manteiga a partir de agosto de 2025”. Explican, non obstante, que “unha mellora na composición do mix de produtos comercializados permitiu mitigar parcialmente estes efectos adversos”. Na lectura do balance do grupo, hai que ter en conta que en 2024 a compañía deu un salto xigantesco nos seus resultados, duplicando os beneficios de 3,4 millóns rexistrados en 2023.

Menos manteiga, máis queixo no mercado

Efectivamente, atendendo aos distintos segmentos de negocio de Leite Celta, o mercado da nata e a manteiga foi o que máis se resentiu o pasado ano. As vendas de leite líquido anotadas pola compañía descenderon lixeiramente dos 221 aos 216,7 millóns, mentres que os preparados lácteos medraron, de 46 a 51,6 millóns. As vendas de leite cru tamén caeron dos catro a 1,2 millóns, pero as de nata e manteiga foron as que acumularon o maior batacazo. Un 45% menos, ao pasar de 21,6 millóns en 2024 a 11,9 millóns en 2025. Por contra, as vendas de queixo multiplicáronse, de 1,4 a 7,8 millóns.

Os xestores de Celta expoñen no seu último informe de xestión que “no mercado global, a partir do segundo semestre de 2025, obsérvase unha corrección significativa nos prezos das principais commodities lácteas da Unión Europea, con descensos acusados e abruptos en produtos como a manteiga e o leite en po”.

Explica ademais que “esta evolución trasladouse progresivamente ao prezo pagado ao gandeiro nos distintos estados membros, reflectindo un proceso de reequilibrio entre a oferta e a demanda”. “En España, sen embargo, este axuste nos prezos da materia prima na orixe non comeza a apreciarse ata abril de 2026”, expón, en relación ao fortísimo retroceso que golpeou ao prezo do leite na orixe e ao sector gandeiro galego.

En todo caso, a particular crise da manteiga podería ser de ida e volta. Celta reduciu as vendas de manteiga pero disparou as de queixo. Explica na súa memoria que as vendas de queixo branco pasteurizado “incrementáronse de forma significativa” e que, na actualidade, atópase na fase final de validación dunha nova gama de queixo fundido. “De cara a 2026, prevese un crecemento na categoría de produtos sólidos, especialmente queixo e manteiga”, prevén.

Celta anunciou o pasado ano a posta en marcha dunha alianza coa cooperativa Clun, que naceu da unión de Feiraco, Os Irmandiños 
e Melisanto. Esta unión, CoRural, espera conformar un operador con 1.400 produtores de leite, 800 persoas empregadas, oito plantas industriais e marcas como Celta, Feiraco, Clesa ou Únicla. “Á data de formulación das presentes contas anuais consolidadas, a operación atópase pendente de autorización por parte da Comisión Nacional dos Mercados e a Competencia (CNMC), se ben agárdase que dita autorización se obteña a curto prazo”, expoñen.