Metrovacesa inicia a comercialización das case 100 vivendas da Torre Aura en A Coruña

Metrovacesa lánzase á comercialización do seu terceiro proxecto residencial en Galicia. A promotora inmobiliaria empezou a venda das 96 vivendas da Torre Aura, situada no barrio coruñés de San Pedro de Visma.

A firma estima un investimento de 28,5 millóns de euros para o desenvolvemento deste novo residencial. As 96 vivendas dispoñen de dous a catro dormitorios e todas elas contan con garaxe, trasteiro e terrazas. “O edificio foi deseñado para aproveitar a luz natural e ofrecer vistas ao mar e á montaña. As vivendas, con superficies desde 72 metros cadrados, presentan diferentes tamaños e orientacións. O complexo inclúe dúas prazas de garaxe por vivenda e zonas comunitarias con áreas verdes, ximnasio e sala común”, destaca Metrovacesa a través dunha nota de prensa.

“Torre Aura desenvolverase baixo os criterios do sello propio Domum de Metrovacesa, que promove as mellores prácticas en sustentabilidade, eficiencia enerxética, confort interior e calidade ambiental. Este estándar garante vivendas máis saudables, eficientes e respectuosas co entorno, con cualificación enerxética A tanto no consumo de enerxía como en emisións de CO2″, engade a firma.

O proxecto inmobiliario conta co Sello Verde de Calificación Edificio Sostenible e emprega materiais responsables, así como medidas de aforro enerxético e técnicas que reducen o impacto ambiental durante todas as fases do proxecto, desde o deseño ata a construción e uso posterior do edificio.

Torre Aura é un dos tres proxectos residenciais de Metrovacesa en Galicia. Este únese ao Residencial Caleida, tamén ubicado na cidade herculina, e ao Residencial Novolérez IV, situado en Pontevedra. “Estas promocións reflecten a aposta da compañía por un urbanismo de calidade, eficiente e adaptado ás necesidades locais, en ubicacións estratéxicas dentro do tecido urbano das principais cidades da rexión”, reivindica a compañía participada ao 49,4 por o Banco Santander.