Moda, ximnasios, cafeterías e obradoiros, as aventuras empresariais de Óscar Pereiro, Ana Peleteiro e Iván Raña

Galicia non tivo ata o momento ningún campión do mundo no ámbito do fútbol, pero si colecciona medallas olímpicas, un Tour de Francia e mundiais de triatlón con nomes propios como Óscar Pereiro, Ana Peleteiro, David Cal, Teresa Portela, Iván Raña ou Javier Gómez Noya.

A maioría deles desenvolveron unha intensa actividade empresarial ao marxe do deporte. É o caso de Óscar Pereiro. O ciclista nacido en Mos, gañador do Tour de Francia do ano 2006 tras a descalificación de Floyd Landis, impulsou meses despois da súa retirada as sociedades Pereiro Sports SL e Champions Factory SL, dedicadas ao marketing deportivo e á organización de eventos relacionados co deporte.

O que fora corredor de Phonak e Caisse d’Epargne tamén constituíu en 2014 a empresa Fashion and More SL, unha firma de moda deportiva na que é administrador único. Un 80% das prendas confecciónase en Italia, de onde procedía o grosso dos deseños, mentres que o 20% restante facíase en Portugal.

Pereiro complementou así a súa intensa actividade tras colgar a bici, que lle levou a ser xogador do Coruxo Fútbol Club, piloto de rallies, tertuliano en El Chiringuito de Jugones e comentarista deportivo na Cadena Cope.

O camiño de Ana Peleteiro

Pereiro agardou á súa retirada para emprender estas aventuras profesionais, pero outra das mellores deportistas galegas da historia escolleu a recta final da súa carreira para iniciar os seus proxectos. É o caso de Ana Peleteiro. A atleta de Ribeira, campioa do mundo xuvenil en Triplo Salto en 2013, bronce olímpico en Tokyo (2021) e campioa de Europa ao aire libre en Roma (2024), ten dous anos por diante para buscar a clasificación aos Xogos Olímpicos de Los Ángeles e compaxinará a súa preparación coa súa labor en Área Café Galicia e Horizon Sports.

Esta última foi constituída en Madrid no 2024 e no seu obxecto social figura “a creación e realización de campañas publicitarias; creación e colocación de publicidade en xornais, revistas, radio, televisión, internet e outros medios de comunicación; a creación e colocación de publicidade exterior en carteis, valos publicitarios e táboas de anuncios”.

Un ano despois, en 2025, Ana Peleteiro aproveitou o seu regreso de Guadalajara (onde adestrara os últimos anos) á súa Ribeira natal para crear Área Café Galicia. A través desta sociedade, a atleta galega xestiona unha cafetaría na que ofrece café de especialidade, té matcha, frappés e bollería feita no día.

Este é o seu segundo negocio en Galicia, toda vez que a medallista olímpica impulsara xunto ao futbolista do Bayer Leverkusen, Lucas Vázquez, e á adestradora Cris Díaz o ximnasio Crys Dyaz & Co A Coruña, situado na zona da Marina da cidade herculina.

Os reis do triatlón

Tamén en Ribeira está radicada a sociedade Raña y Martínez SL. Trátase da firma impulsada polo campión mundial de triatlón no ano 2002, Iván Raña. O seu obxecto social xira en torno á venda ao por menor e ao por maior de “artigos e material deportivo, así como de calzado, roupa e artigos téxtiles”.

O tamén dobre campión de Europa e ouro Mundial de acuatlón pasou das dúas ás catro rodas. E é que, ademais de consumar o seu salto ao mundo dos rallies con GR Breogán Rally, Iván Raña leva as rendas de Raña Racing na súa Ordes natal. A súa actividade céntrase en “a reparación, revisión, conservación e mantemento de todo tipo de vehículos e automóbiles de tracción mecánica e bicicletas”, así como na “explotación de taller dedicado ao mantemento, acoplamento de implementos e reparación en xeral de vehículos, motores e máquinas citadas”.

Iván Raña foi o primeiro español en gañar o Mundial de triatlón, pero non o único. Outro galego, como é o caso de Javier Gómez Noya, coleccionou cinco títulos mundiais, catro europeos e unha medalla de prata nos Xogos Olímpicos de Londres 2012.

O deportista nacido en Suíza e criado en Ferrol constituíu en outubro de 2021 a sociedade JGN Group, dedicada á “xestión e promoción do deporte; organización de todo tipo de actividades deportivas, educativas e recreativas; asesoramento de investimento, comunicación, marketing e xestión de patrocinio por conta propia e allea de eventos, e actividades deportivas”.

A firma está domiciliada en Pontevedra, cidade na que residiu a maior parte da súa carreira deportiva e que lle serviu de base de operacións para os seus adestramentos. Esta labor da organización de eventos pasou do deporte ao ámbito musical despois de que Javier Gómez Noya fose o impulsor xunto a Fernando Fernández Pichel da primeira edición do Invernia Fest, que tivo lugar os pasados 6 e 7 de febreiro no recinto feiral de Pontevedra e que contou con La Fuga, Sôber, Efecto Mariposa e Obús como cabezas de cartel.