Monbus, entre Bartomeu e Laporta: renova co Barça e suma unha década como provedor cos seus autobuses
Monbus sumará unha tempada máis como operador oficial do Barcelona e prolongará un vínculo que se iniciou no ano 2017.
Imaxe dun dos autobuses do FC Barcelona que opera Monbus / Monbus
Comentarios
Monbus prolonga o seu vínculo co Fútbol Club Barcelona. A empresa santiaguesa renovou o acordo de colaboración coa entidade que preside Joan Laporta para exercer como operador oficial do transporte do club por unha tempada máis.
Deste xeito, Monbus será provedor do Barcelona ata, como mínimo, o ano 2027, cumprindo así unha década desde a sinatura da súa alianza, cando o club tiña como presidente a Josep María Bartomeu.
“Esta renovación non só subliña a confianza do club nos estándares técnicos de Monbus, senón que consolida a firma como o referente indiscutible en solucións de mobilidade para o deporte de elite”, explicou a compañía galega.
Desde a firma que capitanea Raúl López reivindican que o acordo reafirma o seu compromiso co deporte catalán, tamén a través do patrocinio doutros clubes como o Monbus Club Bàsquet Igualada e o Bàsquet Manresa, e fóra de Cataluña, co Monbus Obradoiro.
