Nogar e a súa aseguradora bótanse atrás na lea millonaria con Pontevedra polo lume de Pontesa

Generali retírase da disputa millonaria co Concello de Pontevedra polo incendio do galpón da antiga Pontesa. A aseguradora de Galigrain, empresa que utilizaba estas instalacións para almacenar cereais ata o seu incendio en 2022, desistiu de reclamar ao Concello de Pontevedra os 10,38 millóns de euros que esixía como compensación por danos e perdas por este incendio no que faleceu un traballador.

A aseguradora comunicou ao Xulgado do Contencioso-administrativo número 2 de Pontevedra a súa intención de non seguir adiante con este procedemento no cal denunciaba a “neglixente” actuación do servizo municipal de extinción de incendios.

A concelleira de seguridade cidadá, Eva Vilaverde, informou desta noticia que ten lugar despois de que a Audiencia Provincial arquivara a causa aberta contra o xefe do operativo de bombeiros que actuou nese incendio, Juan José Graña.

Vilaverde explicou que o goberno local esperaba que a aseguradora desistise desta demanda: “Parecíanos bastante surrealista que se presentasen estas reclamacións” despois de todo o traballo que fixeron alí os bombeiros “e as condicións nas que se mantivera a nave”.

Tras o arquivo desta causa, unicamente “queda vivo” un proceso, segundo lembrou Eva Vilaverde. Trátase do impulsado por Galigrain ao solicitar unha indemnización de 1,13 millóns de euros posto que Allianz, aseguradora da propietaria da nave Itaipu Trade, xa non chegou a reclamar ante o xulgado os 553.000 euros que lle pedía ao Concello.

A tamén tenente de alcalde lamentou que a empresa “siga reclamándolle a este Concello unha responsabilidade patrimonial por un incendio que non causou senón que apagou”.