O ‘boom’ da defensa dispara o valor de mercado de Urovesa ata case 400 millóns.
Urovesa crece a ritmo de dobre díxito en facturación e prepárase para duplicar a súa capacidade produtiva en Valga no medio das previsións dun salto na inversión en defensa que impulsou as valoracións no sector.
Sede Urovesa
Comentarios
Urovesa e Navantia perfilanse como as dúas grandes empresas con actividade en Galicia que máis se beneficiarán dos plans de rearme na Unión Europea. A compañía con sede no concello pontevedrés de Valga afronta un ano clave no que iniciará as obras para duplicar a súa capacidade produtiva e, ademais, entregará os primeiros prototipos dos vehículos VERT encargados polo Ministerio de Defensa.
A firma que preside Justo Sierra adxudicouse a finais de 2025 este macrocontrato valorado en 321,4 millóns de euros e que veu acompañado da concesión dun préstamo de 132 millóns de euros ao 0% de interese por parte do Goberno. O Executivo central xustificou que este movemento serviría para prefinanciar o desenvolvemento tecnolóxico deste programa que coincide no tempo co plan de modernización do sistema antiaéreo Nasams.
Urovesa engordou a súa carteira de pedidos nos últimos anos con acordos como o asinado co Ministerio de Defensa para o subministro dun máximo de 700 vehículos con capacidade de carga útil de 1.500 quilos por un importe de 146 millóns, así como co asinado en 2024 co goberno neozelandés por un importe de 56 millóns para subministrar 60 vehículos militares.
Os números de Urovesa
Urovesa atraviesa este particular boom no sector da defensa e faino consolidada na senda da rendibilidade. Non en van, a firma galega despediu o seu exercicio fiscal 2024 (último con datos dispoñibles) cun salto do 11,9% na súa facturación, que se elevou ata os 122,1 millóns de euros, e do 11,8% nun beneficio neto que ascendeu a 17,16 millóns de euros.
Pola súa banda, o ebitda (resultado bruto de explotación) escalou de 21,57 a 23,95 millóns de euros. É por iso que, asumindo un multiplicador da media do sector, Urovesa vería como o seu valor de mercado se elevaría ata o entorno dos 361 millóns de euros.
E é que, segundo o xornal El Economista, as 15 principais do sector da defensa con presenza en bolsa (Lockheed Martin, RTX Corporation, Boeing, Northrop Grumman, General Dynamics, BAE Systems, Airbus, Thales, Leonardo, Dassault Systèmes, Safran, Rheinmetall, Rolls-Royce, Indra e Iveco) presentan unha capitalización que multiplica por 15,1 veces o seu ebitda.
Neste caso, a valoración de Urovesa moveríase mesmo á alza no caso de cumprirse as positivas perspectivas que a compañía manexa para estes anos. E é que os 23,95 millóns de euros de ebitda colleitados en 2024 quedarán, previsiblemente, por debaixo das cifras do recentemente finalizado 2025 e, sobre todo, dun 2026 para o que se vaticina un novo salto da man da súa nova capacidade produtiva e dos encargos clave co Ministerio de Defensa.
A expansión de Urovesa
O propio Justo Sierra desvelou durante a visita da ministra de Defensa, Margarita Robles, ás súas instalacións de Valga o pasado verán que as previsións da compañía apuntaban a unha facturación de entre 145 e 150 millóns de euros xa en 2025. Estas estimacións, no caso de cumprirse, suporían un salto do 22,9% respecto a 2024.
En 2026, ademais desta inercia positiva na súa conta de resultados, a compañía ten previsto dotarse de 106.000 metros cadrados adicionais para elevar de 2.500 a 5.000 o número de vehículos fabricados cada ano, comezará a entregar os primeiros VERT e despregará os seus innovadores modelos propulsados por hidróxeno.
É por iso que a valoración de Urovesa podería mesmo moverse á alza da man destes plans de expansión. Todo iso co ruído de tambores en torno aos plans do Goberno para consumar a fusión entre Indra e Escribano Mechanical & Engineering (EM&E), cuxa valoración de mercado rolda os 1.500 millóns de euros, de acordo a medios especializados.
