O Deportivo estreará ‘nova pel’ na DeporTenda de Riazor
O club coruñés reabriu as portas da súa DeporTenda tras unha reforma integral coa que aposta pola "IA, materiais sostibles e un deseño innovador".
Imaxe do interior da renovada DeporTenda do Estadio Abanca-Riazor / RCD
Comentarios
A DeporTenda do Estadio Abanca-Riazor reabre as súas portas. O Deportivo da Coruña abriu este venres as portas da súa tenda oficial nun acto que contou coa presenza de Yeremay Hernández, Luismi Cruz, Millene Cabral e Noé Carrillo.
O conxunto que preside Juan Carlos Escotet deu por rematadas estas obras coas que buscou “construír un ecosistema innovador que combina infraestruturas físicas e dixitais, en liña con proxectos recentes como a ampliación do Dépor Training Center, o nacemento do Dépor Museo&Tour ou as novas áreas de hospitality do estadio, Club Riazor e Bar Bruma“, tal e como asegura a través dunha nota de prensa.
“O proxecto, desenvolvido por Noumena Group, representa unha transformación integral baseada no estudo de datos a través de ferramentas de IA, materiais sostibles e un deseño innovador que conecta coa identidade deportivista”, engade o club herculino.
O Deportivo aposta por unha experiencia inmersiva na que integra tecnoloxías de análise de datos e intelixencia artificial a través de
Noumena Data. O novo concepto espacial foi liderado por La Máquina e deseñado por External Reference e introduce unha “narrativa visual e emocional conectada coa identidade do club e o seu contorno atlántico”.
“Entre os elementos máis destacados atópase unha gran estrutura en forma de onda, inspirada na marea branquiazul e no vínculo histórico do Deportivo co mar, concebida como símbolo do sentimento deportivista. Esta gran onda está formada por plásticos reciclados (PETG) mediante
impresión 3D robótica, o que reduce o impacto ambiental e fomenta a economía circular”, explica o club, que apostou por solucións avanzadas de purificación do aire coa tecnoloxía Pure Tech.
“Con esta apertura, o Deportivo dá un paso máis no seu obxectivo de consolidarse como un club de referencia non só no ámbito deportivo, senón tamén na innovación, sostibilidade e conexión coa súa afección”, apunta o club, que afronta as sete últimas xornadas de competición instalado en postos de ascenso directo a Primeira División.
