O director xeral de Pharma Mar aproveita a escalada na bolsa e vende coas accións nos máximos de 2026

Pharma Mar prolongou as súas subidas en bolsa e xa se revaloriza un 20,6% en bolsa no que vai de 2026. As accións da compañía que preside José María Fernández de Sousa consolidáronse por riba do nivel dos 90 euros, o que supón o seu nivel máis elevado desde o pasado mes de outubro.

Coa compañía instalada en máximos non vistos desde hai seis meses, o seu director xeral, Luis Mora, executou a venda dun total de 811 títulos.

Así o comunicou a propia Pharma Mar á Comisión Nacional do Mercado de Valores (CNMV). De acordo coa documentación en mans do organismo que preside o lucense Carlos San Basilio, esta operación realizouse o pasado 27 de marzo e reportou 73.395 euros a Luis Mora.

A venda de accións executouse a un prezo medio de 90,5 euros, lixeiramente por riba dos 88,35 euros cos que pechou esa sesión e superando tamén os 90,35 euros aos que avanza nesta sesión de xoves na que anota unha subida de arredor dun 0,85%.

Luis Mora percibira o día anterior un total de 146 títulos a un prezo unitario de 81,57 euros con motivo da súa participación no plan de entrega de accións que Pharma Mar aprobou na súa xunta xeral ordinaria de accionistas de xuño de 2025.

Este movemento supuxo unha achega de 11.909 euros para o director xeral da unidade de negocio de Oncoloxía de Pharma Mar, que acumula 18 anos á fronte desta área de negocio na compañía. Previamente, Luis Mora exerceu como director financeiro da compañía entre os anos 2000 e 2006.