O maior grupo lácteo galego explora o sector inmobiliario e promoverá un parque industrial sostible

Grupo Lence, a maior empresa láctea galega, iniciou un proceso participativo co que pretende establecer un diálogo cos axentes sociais sobre un proxecto singular, moi afastado da produción e recollida de leite: a promoción dun parque industrial sostible. En realidade, a compañía que capitanea Carmen Lence xa explorou territorios alleos ao sector primario, como os hoteis, as gasolineiras ou os hospitais (a empresaria, e antes o seu pai, foron accionistas de Polusa, agora en mans de Ribera Saúde). Con todo, o desenvolvemento urbanístico de 180.000 metros cadrados que o dono de Leite Río e Leyma ten sobre a mesa, está vinculado á súa actividade cuore. A urbanización permitirá completar o bordo noroeste do actual parque empresarial do Ceao, onde a compañía ten a súa sede e a súa principal fábrica.

O grupo, que decidiu parar un proxecto de biogás con Norvento, Agroamb e Medrar Smart Solutions ante a aparición dun sector crítico coa iniciativa, celebrou este xoves, nas súas instalacións, o primeiro obradoiro público do proceso participativo vinculado ao desenvolvemento do sector SI6 do Ceao, nun acto ao que asistiron Carmen Lence, presidenta de Grupo Lence, e Roberto López, socio-director de Urben Consultores. O obradoiro constitúe a primeira acción pública do proceso de participación que acompañará o proxecto ao longo da súa tramitación e serviu para coñecer as opinións de diversos representantes sectoriais de Lugo sobre as necesidades do ámbito local e para recoller achegas relativas a equipamentos e servizos, espazos libres e zonas verdes, actividades económicas e solo industrial, así como elementos medioambientais da zona, segundo explicou Grupo Lence nun comunicado.

Os 180.000 metros cadrados de desenvolvemento previstos posibilitarán a execución de máis de 55.000 metros cadrados de uso industrial, mentres que se reservarán máis de 70.000 para dotacións públicas, como zonas verdes e equipamentos. O proxecto foi concebido para cumprir estándares de sustentabilidade urbanística que se aliñan cos principios de BREEAM España, que abordan aspectos como a gobernanza, o benestar social e económico, recursos e enerxía, ecoloxía do solo e transporte e mobilidade.

En que consiste o proceso participativo

Tras este primeiro obradoiro, o proceso participativo continuará con sesións sectoriais e reunións abertas a colectivos e veciños durante os próximos meses. Grupo Lence e Urben analizarán as achegas recollidas para incorporalas á correspondente memoria de participación e ao deseño final do planeamento que se presentará ao Concello de Lugo para a súa tramitación.

O desenvolvemento urbanístico do sector SI-6 propón unha intervención integral que combina ordenación de usos industriais con dotacións públicas, espazos verdes e medidas de eficiencia e xestión responsable de recursos. A ambición do proxecto é converterse no primeiro desenvolvemento de solo industrial de carácter produtivo en España que obteña a certificación de sustentabilidade urbanística conforme aos estándares de BREEAM España, marcando un novo estándar para a planificación industrial sostible, segundo asegura a empresa.

O propósito de Grupo Lence

Carmen Lence vinculou este proxecto ao propósito do seu grupo empresarial, á ambición de demostrar “que tipo de empresa” son e como queren “seguir contribuíndo ao desenvolvemento” da cidade. “Grupo Lence decidimos impulsar este proxecto cunha ambición clara: que o desenvolvemento do entorno da nosa fábrica no Ceao sexa un referente en España na maneira de abordar solo industrial. Non só desde o punto de vista técnico ou económico, senón desde unha visión integral de sustentabilidade. Cremos que non se pode deseñar un proxecto así sen escoitar e por iso este proceso de consulta e participación non é un complemento do proxecto: é parte esencial do mesmo. Queremos abrir o deseño á comunidade local e ás partes interesadas. Queremos coñecer de primeira man cales son as necesidades reais, as prioridades, as oportunidades e tamén as preocupacións que existen neste ámbito”, expuxo a empresaria.

Por outra banda, Roberto López, socio-director de Urben, engadiu que “este obradoiro é o inicio dun proceso técnico e participativo rigoroso”. “O noso obxectivo é aplicar criterios de sustentabilidade urbanística sobre a base do estándar BREEAM de maneira práctica en cada fase do proxecto —desde a gobernanza ata a mobilidade— para lograr un desenvolvemento industrial que sexa exemplar a nivel autonómico e nacional. A colaboración entre promotor, consultores, administracións e axentes locais é a vía para conseguir un modelo de solo industrial que maximice beneficios sociais, económicos e ambientais”, dixo.