O PP galego ve "imprudencia" e "sectarismo" no Goberno polo rexeitamento ás axudas para Altri

O voceiro parlamentario do PPdeG clama contra o Goberno tras o seu non á concesión de axudas públicas a Altri para o seu proxecto en Palas de Rei. Alberto Pazos Couñago afirmou este venres que lle “sorprende” a “contundencia” da vicepresidenta terceira e ministra para a Transición Ecolóxica, Sara Aagesen, ao pechar as portas das axudas públicas a Altri.

“Sorpréndeme a contundencia, tendo en conta que vén dunha ministra á que non lle corresponde tomar esa decisión”, manifestou, a preguntas dos medios, Pazos Couñago, que tamén mostrou a súa “sorpresa” polo feito de que en procedementos que “se supón que son de concorrencia pública” haxa ministras “como Aagesen ou antes Yolanda Díaz” que “xa garanten antes de que se presenten as solicitudes que non van ter axudas”.

Segundo o voceiro popular, isto mostra “claramente” o que ocorre coa “tramitación dos fondos europeos”, concedidos, na súa opinión, en algunhas comunidades “antes de facer calquera tipo de avaliación do proxecto e comprometidos publicamente por destacados membros do Goberno” ao tempo que son “negados a Galicia a pesar de que se fan avaliacións ambientais rigorosas e de que contan con todos os informes técnicos positivos”.

É por iso que Pazos instou a reflexionar sobre a “imprudencia de determinados membros do Goberno”, así como ao “sectarismo” co que, ao seu xuízo, “parece que se están tramitando algunhas desas axudas europeas”. “Espero que reflexionen e espero que desde o Ministerio de Industria teñan máis rigor do que se mostrou até agora desde outros ministerios”, asegurou.