A crise da vivenda abre unha nova fenda entre o PP e o PSOE

• O PP galego denuncia o «tsunami de corrupción do Goberno» e pide eleccións anticipadas
• Rueda reivindica a súa maioría absoluta tras o tropezón de Moreno Bonilla e ve «nefasto» o resultado do PSOE

Novo choque entre o PP galego e o PSOE a conta da situación do mercado da vivenda. A secretaria xeral do PPdeG, Paula Prado, reclamou este sábado unha maior oferta de vivenda e seguridade xurídica fronte ao plan “insuficiente e sen consenso” impulsado polo Goberno de Pedro Sánchez.

Durante unha xornada informativa celebrada na Praza de Abastos de Celanova, Prado cualificou de “desastrosa” unha lei estatal de vivenda que, ao seu xuízo, “pensa máis nos okupas que nos propietarios”. Nesta liña, a número dous do PP galego defendeu as políticas “efectivas, pragmáticas e reais” da Xunta fronte a unha lei estatal que, ao seu xuízo, xera “inseguridade”.

Prado lembrou o compromiso adquirido polo Goberno de Alfonso Rueda para esta lexislatura: duplicar o número de vivendas públicas en Galicia, pasando de 4.000 a 8.000. Ademais, destacou que o Executivo autonómico conta este ano cun orzamento “histórico” de 350 millóns de euros e un plan de acción que inclúe “novas modificacións lexislativas, tributarias e fiscais para incentivar e favorecer a construción de nova vivenda”.

Por outra banda, o presidente provincial do PP de Ourense, Luis Menor, advertiu de que a falta de vivenda non é só unha crise habitacional, senón un “terrible obstáculo para o crecemento económico, tamén no rural”. Neste sentido, puxo o foco no crecemento demográfico da provincia de Ourense, “que roza os 307.000 habitantes, dos que 10.000 son novos veciños, na súa maioría migrantes”.

Besteiro pide “consenso político e social” coa vivenda

Nunha xornada marcada pola nova manifestación en Santiago de Compostela por “un dereito á vivenda”, tamén se pronunciou sobre a materia o secretario xeral do PSdeG. José Ramón Gómez Besteiro defendeu este sábado a necesidade dun “amplo consenso político e social” para converter o dereito á vivenda no “quinto piares” do Estado de Benestar.

Durante un encontro aberto ao público en Baiona, o dirixente socialista lamentou que a falta de vivenda é “a principal barreira” para construír un proxecto de vida e que, por ese motivo, unha das prioridades do PSdeG “é que ninguén teña que renunciar ao seu futuro”. Ademais, lembrou que “xa son máis de 33.000 as persoas que demandan unha vivenda pública, o dobre que ao inicio do mandato” e insistiu en que “o problema non fai máis que agravarse”.

“Non é un problema novo, xa que a Valedora do Pobo vén alertando da situación desde o 2014. En 17 anos non se executou vivenda pública e só comezou a moverse co impulso dos socialistas, cos fondos europeos e a Lei de Vivenda“, defendeu. Neste contexto, Besteiro referiuse á “contradición insostible” que vive Galicia, xa que na comunidade “hai máis de medio millón de vivendas baleiras mentres miles de persoas buscan unha”, segundo lamentou.

Besteiro reclamou que a vivenda protexida “o sexa para sempre” e se blinde a través dunha modificación de lei para que manteña esa condición. A segunda medida á que se referiu sería a creación dun banco público de aluguer, co fin de mobilizar as vivendas baleiras.

Tamén insistiu en que ningún mozo que o necesite quede sen bono de aluguer por falta de fondos; en regular os alugueres de tempada “frenando os abusos” e en cambiar a Lei de Vivenda de Galicia para recuperar a superficie mínima “digna” de 40 metros cadrados para aloxamentos compartidos. Finalmente, instou a retirar do mercado os pisos turísticos ilegais, regular por lei o aluguer de habitacións, e impulsar e tramitar directamente as zonas tensionadas desde a Xunta.