A Xunta arremete contra o Plan Estatal de Vivenda: “É insuficiente e invade competencias”
A conselleira de Vivenda, María Martínez Allegue, cre que o programa aprobado polo Goberno esta semana “chega moi tarde” e volve indicar a “ineficacia” das declaracións “de zona tensionada” como na Coruña e Compostela.
Imaxe da fachada dun edificio cun cartel de “véndese” nun dos pisos.
Comentarios
A conselleira de Vivenda e Planificación de Infraestruturas, María Martínez Allegue, cargou contra o Plan Estatal de Vivenda 2026-2030, aprobado esta semana no Consello de Ministros, polos prazos da súa tramitación e porque cre que “invade competencias”: “Chega tarde, moi tarde. Tiña que estar en vigor o 1 de xaneiro de 2026”.
Así se pronunciou este domingo nunha entrevista concedida a Radio Galega. Preguntada por esta cuestión, a responsable autonómica censurou a “opacidade” que atribúe ao Goberno central e criticou os efectos que este atraso terá, ao seu xuízo, nas Comunidades Autónomas (CCAA).
Aplicación na segunda parte do ano
“Que se aprobase no Consello de Ministros e saíse publicado no Boletín Oficial do Estado (BOE) non significa que as comunidades poidamos convocar as liñas de axudas que dependen deste plan“, expuxo Allegue, que lembrou que aínda quedan “máis pasos” para que isto suceda.
Deste xeito, avanzou que a próxima semana se celebrará unha Conferencia Multilateral cos directores xerais dos gobernos autonómicos para a aprobación da repartición de fondos, que despois se levará a unha Conferencia Sectorial cos conselleiros. Finalmente, o Plan de Vivenda terá que volver pasar polo Consello de Ministros e ser conveniado coas autonomías.
“Estamos a falar de dous ou tres meses, aínda que a ministra dixo que contaba con que fose o segundo semestre de 2026. Dá medo. Parece que mesmo podemos ter un ano perdido en convocatorias tan importantes”, lamentou.
“Invasión de competencias”
Ademais, Allegue sumouse ás críticas emitidas por outros gobernos autonómicos respecto dunha “invasión” de competencias, que exemplificou coa obriga de que as vivendas construídas ao abeiro deste plan deberán ter protección pública permanente.
Tamén criticou a súa dotación económica “insuficiente”. O Goberno central destinará 7.000 millóns de euros ao plan, cofinanciado polas CCAA, que achegarán o 40 % restante. Neste senso, a Galicia correspóndelle destinar 400 millóns, dos cales 80 xa están consignados nos últimos orzamentos, aínda que non “pode” convocalos.
Declaración de zona tensionada
Por outra banda, cuestionada polas zonas de mercado residencial tensionado, a conselleira reiterou o desacordo do Goberno galego con esta medida, aínda que o venres pasado deron luz verde a que Santiago de Compostela obteña este distintivo, que entrará en vigor unha vez sexa publicado no BOE.
Ao seu xuízo, a medida é “totalmente ineficaz” e está a causar “os efectos contrarios aos que se desexan”: “A Coruña foi declarada zona tensionada en agosto do ano pasado. En xullo formalizáronse preto de 800 contratos de aluguer. Este mes de febreiro foron apenas 350; é dicir, están a retirar vivendas do mercado”.
