Rueda reivindica a súa maioría absoluta tras o tropezón de Moreno Bonilla e ve «nefasto» o resultado do PSOE
O presidente da Xunta considera "lóxico" que o PP negocie con Vox e defende que os resultados nas eleccións andaluzas poñen de manifesto "o complicadas que son as maiorías" no novo escenario político.
Rueda comparece tras o Consello da Xunta. – DAVID CABEZÓN @ XUNTA
Comentarios
Alfonso Rueda ve nos resultados en Andalucía un anticipo da nova normalidade. O presidente da Xunta e líder do PPdeG felicitou ao popular Juanma Moreno, “o gañador sen ningunha dúbida” das eleccións en Andalucía, e pediu poñer en valor as maiorías absolutas tras recoñecer que Vox terá un papel “decisivo” neste novo escenario.
Na rolda de prensa posterior á reunión semanal do Consello, Rueda argumentou que os resultados deste domingo poñen de manifesto “o complicadas que son as maiorías”. Tras lamentar que o obxectivo de repetir maioría absoluta “non se conseguiu”, Rueda pediu poñer en valor “o alto porcentaxe” de voto logrado por Moreno Bonilla. “É certo, Vox aumentou menos do que esperaba e agora pode ser decisivo”, aseverou antes de criticar aos que “din que é impensable chegar a un acordo” porque, na súa opinión, “desprezan o que din os electores andaluces”.
Por outra banda, Rueda criticou ao PSOE tras colleitar “o seu peor resultado da historia”. “O de Juanma Moreno é o segundo mellor e o do PSOE é o peor. As mensaxes son claras. Nun e noutro sentido”, manifestou. Preguntado polo feito de que Vox aumente a súa presenza nas autonomías, o presidente da Xunta insistiu en que se debe “respectar o que queren os electores”, xa que, ao seu xuízo, nas eleccións, “a xente pronunciándose está expresando como quere que sexan os gobernos e hai que darlle normalidade a isto”.
Rueda ve “lóxico” negociar con Vox
É por iso que, ao seu xuízo, “o lóxico” é “entablar negociacións”, lamentando que “os que se botan as mans á cabeza por negociar con Vox, atopan normal falar con outras forzas políticas que teñen posturas máis radicais”.
Nesta mesma liña, preguntado sobre se lle preocupa “o auxe de Vox“, Rueda insistiu en que foi “bastante menos do que eles contaban”, a pesar de que “a aritmética faga que sexan necesarios para complementar unha maioría”. Isto, destacou, “pode materializarse de moitas maneiras”, pero salientou que é Juanma Moreno “quen ten que decidir a mellor forma e como ten que actuar a partir de agora”.
Así mesmo, cuestionado sobre se cre que o PP nacional debería ter máis en conta a Galicia, onde Vox non ten ningunha representación institucional, Rueda afirmou que o presidente do PP nacional, Alberto Núñez Feijóo, “sempre ten en conta” as opinións de Galicia, do mesmo xeito, engadiu, que el considera “todo o que lle poida aportar en sentido inverso”.
“Pero quen é responsable de decidir é cada un: o presidente do PP, a nivel nacional, e eu mesmo para o PPdeG, polo tanto, seguirannos escoitando”, expuxo.
En clave galega, Rueda manifestou que o seu “obxectivo é seguir tendo a maioría necesaria para non estar neste tipo de situacións. Creo que en Galicia é posible. A miña responsabilidade é esa, creo que é posible e imos seguir traballando. Onde hai outras realidades hai que partir con outro tipo de plantexamentos”, subliñou.
Cuestionado sobre cal cree que é a particularidade da comunidade galega, Alfonso Rueda considerou que “nin é mérito absoluto de alguén, nin demérito da outra parte”, senón que se trata dun “conxunto de cousas”.
“Quédome coa parte que creo que é máis influínte: a confianza maioritaria dos galegos na opción política do PPdeG porque cre que todo aquilo que demandan dun responsable ou unhas responsabilidades públicas, xestión, eficacia, honradez, coherencia, principios… atópanos no PPdeG, non teñen que buscar outras opcións”, sinalou.
En todo caso, matizou que iso non quere dicir que noutros lugares os seus compañeiros de partido “non o ofrezan”, pero en Galicia, insistiu, “a xente considera que isto se produce e por iso dáse ese resultado, único en España“, que espera “que siga sendo así”.
Por outra banda, cuestionado sobre se, tras a perda da maioría en Andalucía o PPdeG queda como “único contrapeso moderado” á presidenta de Madrid, Isabel Díaz Ayuso, Rueda subliñou que “non se compite con ninguén”, poñendo en valor de novo “o mérito que teñen as maiorías absolutas”. “Aquí, nin rivalizamos, nin uns temos que cubrir as cousas que fan outros. Complementámonos entre todos e formamos parte dun partido que nos catro procesos electorais obtivo vitorias significativas”, zanjou.
O factor Adelante Andalucía
En paralelo, Rueda tamén se pronunciou sobre o resultado de Adelante Andalucía, do que dixo que, “vendo os resultados do PSOE” ve “claro” de onde “poden vir eses apoios”.
Para o presidente galego, as forzas de esquerdas “tiveron malos resultados” este domingo, especialmente, reiterou, o PSOE, que cre que “debería reflexionar”.
“Isto será un chanzo máis na debacle xeral do PSOE cada vez que se presenta a unhas eleccións e fai que este tipo de forzas vaian recollendo ese voto que antes era tradicionalmente socialista”, apostilou.
