Rueda «intentará» acudir á manifestación do PP contra Pedro Sánchez en Madrid.

O presidente da Xunta avanza a súa intención de acudir á manifestación que o PP convocou este domingo 30 de novembro ás 12.00 horas no Templo de Debod de Madrid contra o Goberno.

O presidente da Xunta avanzou que, aínda que este fin de semana ten unha axenda “potente”, “intentará” ir a esta mobilización que leva por lema Efectivamente: ¿Mafia ou democracia?. “Vai de mandar unha mensaxe a Pedro Sánchez de que así non podemos seguir”, valorou o presidente galego tras ser preguntado, en declaracións aos medios, pola súa asistencia á convocatoria, cuxo motivo cre que comparten “millóns de españois” e mesmo “moitos” votantes do PSOE.

Trátase, a xuízo de Rueda, dunha mobilización “cívica”, “aberta” e “sen siglas” e que ve como unha “boa opción” para expresarse ante casos de corrupción “gravísimos” -que une á “imaxe internacional” que se está “transmitindo”- e ante a “sensación real de bloqueo” no ámbito lexislativo.

“A mensaxe que hai que lanzar é que o pobo español, e por suposto os galegos, temos que falar e tomar un novo rumbo; e iso é o que hai que dicir aparte da propia gravidade da situación”, defendeu.

As filtracións a Ábalos

En paralelo, tras ser preguntado por informacións que apuntan a que Sánchez filtrou a Ábalos que lle estaban investigando, instou ao presidente do Goberno a aclarar se é certo: “El saberá se o é ou non; a mellor por iso cala”.

Rueda comparouno co desmentido que Sánchez realizou esta semana sobre a suposta reunión mantida co líder de EH Bildu, Arnaldo Otegi, antes da moción de censura. “Iso desmentiuno categoricamente e hai outras cousas nas que cala”, apuntou o presidente galego.