O sector agrario clama contra a escalada dos carburantes e a baixada dos prezos do leite

A Asociación Agraria de Galicia (Asaga) advirte da dobre ameaza á que se enfronta o sector. A entidade que preside Francisco Bello trasladou a súa preocupación pola situación de “vulnerabilidade” que atravesa o sector primario, derivada do aumento dos prezos dos combustibles e fertilizantes debido á inestabilidade xeopolítica.

“Ao grave problema dos custos de produción, en Galicia hai que engadir o abuso das industrias lácteas ao ofrecer contratos a catro meses con descensos de prezos moi significativos respecto aos anteriores, sen ningunha xustificación de mercado e que están asfixiando ao sector”, censurou Bello.

Asaga segue os pasos da Asociación Agraria de Xóvenes Agricultores (Asaja), que previamente solicitara “axuda e apoio urxente” ao Goberno central para garantir o abastecemento de gasóleo agrícola e fertilizantes, así como a posta en marcha dun paquete extraordinario de axudas directas ao sector agrogandeiro.

Nunha carta remitida ao ministro de Agricultura, Pesca e Alimentación (MAPA), Luis Planas, o presidente de Asaja, Pedro Barato, sinalou que “o custo dos fertilizantes xa representa arredor do 35% dos custos de produción, e a suba do gasóleo agrícola na última semana alcanzou entre 0,96 euro/l e 1,4 euro/l nalgúns casos”.

Na misiva tamén pediu reforzar as devolucións do imposto sobre hidrocarburos e bonificacións fiscais aos membros do sector para compensar o encarecemento dos insumos esenciais.

Tras reunirse co titular do ministerio, Pedro Barato indicou que se lle informou de que o Goberno central está a planificar axudas que se aprobarán nun próximo Consello de Ministros, aínda que “non se coñece en que consistirán”. Asaja e Asaga solicitan que estas medidas garantan o abastecemento de gasóleo e fertilizantes, tendo en conta os consumos reais, “para evitar que se repitan erros do pasado”.