O Sergas abre unha investigación a Povisa polas denuncias de falta de médicos.

O Servizo Galego de Saúde (Sergas) iniciou un procedemento interno de control para verificar a situación do hospital privado Ribera Povisa de Vigo tras denuncias coñecidas nos últimos meses por falta de médicos.

Fontes do Sergas confirmaron a Europa Press que se investiga o ocorrido para, no seu caso, adoptar as medidas oportunas que sexan necesarias.

Exixencias do contrato

As mesmas fontes explicaron que foi en abril do ano pasado cando se iniciou a execución do novo contrato de servizos co hospital vigués. Nos pregos do mesmo establécese a obriga de dispor do persoal necesario e adecuado para a execución do contrato, nos termos recollidos e legalmente establecidos e coa máxima calidade esixible, subliña o departamento sanitario da Xunta.

Particularmente, tamén se esixe a cobertura dos medios persoais de forma que a execución do contrato e a adecuada resposta desde o punto de vista asistencial queden sempre garantidas. “Ademais, considérase unha condición especial de execución do contrato dispor en todo momento dos recursos persoais necesarios para garantir a correcta asistencia”, insistiu o Sergas.

Unidade de Supervisión e Control

Para o seguimento destas obrigacións, Sanidade lembra que se creou unha Unidade de Supervisión e Control, incluíndo tamén os pregos da licitación obxectivos de xestión sanitaria de “obrigado cumprimento”. Por iso, agora iniciouse este procedemento interno tras coñecerse supostos casos de falta de médicos.