Alcampo ‘floxea’ no primeiro estudo sobre o gran consumo en 2025, que anticipa récords de facturación.

O primeiro gran estudo sobre a evolución dos supermercados no exercicio pasado detecta estancamento en Alcampo, perda de cota en Carrefour, e crecemento para Mercadona, Lidl e DIA. O balance que realiza NIQ (a antiga Nielsen) indica que esta evolución dispar se produciu nun exercicio de incremento no gasto da cesta da compra, que alcanzou os 131.000 millóns, un 5,8% máis, o que apunta a récords de ingresos nos grupos que conseguiron mellorar a súa penetración, como podería ser a cadea de Juan Roig ou o discounter alemán. Os máis expostos ao hipermercado, como Carrefour ou o grupo que dirixe desde outubro o galego Carlos Pedreira, ex de Inditex e Kiabi, serían os máis penalizados.

Os problemas do hipermercado derivan dun cambio nos hábitos de consumo, cos clientes acudindo con máis frecuencia ás tendas, un 11% máis en 2025, con tickets máis pequenos e priorizando a proximidade. Esta tendencia, a pesar de todo, mitigouse o ano pasado, no que o hipermercado recibiu máis gasto e perdeu menos cota que, por exemplo, o supermercado mediano, pero o seu crecemento foi menor que o da maior parte de canais, o que fai que perda cota.

Neste escenario, Alcampo, que está en pleno proceso de transformación para avanzar cara a un modelo de proximidade e multicanal, resistiu mellor que Carrefour. Os dous grupos franceses perderon cota, pero o de Carlos Pedreira caeu lixeiramente ao 2,9%, 0,1 puntos menos, e Carrefour deixouse 0,2 puntos, quedando no 7,2%. Lidl, que centra o seu crecemento na súa propia expansión territorial e nunha oferta centrada no prezo, sitúase no 6,2% de cota, 0,3 puntos máis, ameazando a segunda posición no mercado español da multinacional francesa.

Mercadona consolida o seu liderado

O gran gañador do ano sería Mercadona, pois NIQ, no estudo O mercado de gran consumo en España. Principais tendencias de 2025, atribúelle unha cota do 29,5%, o que supón un aumento de 0,3 puntos. O grupo líder dos supermercados españois crece tanto como Lidl sen estar nun proceso de expansión da súa rede. DIA, que en 2023 traspasou 224 tendas a Alcampo, parte delas pechadas porque non encaixaban no modelo da multinacional francesa, confirma a súa recuperación e incrementa a súa cota en 0,1 puntos, ata o 4,8%, segundo o informe. Ademais, Consum e Aldi tamén conseguen avanzar no reparto do gasto de gran consumo apoiándose sobre todo en novas aperturas, con cotas do 4,2% e do 1,8% respectivamente.

Sinala NIQ que 1 de cada 4 euros que gastan os fogares en gran consumo van aos supermercados rexionais, o que demostra unha vez máis, a gran fortaleza destes establecementos en España. Esta capacidade de resistencia, a pesar do empuxe de grandes grupos como Mercadona ou Lidl, e nun contexto de aumento do gasto, parece apuntar a un bo exercicio para Gadis, Vegalsa e Froiz, os líderes do mercado galego, caracterizados por unha forte capilaridade no territorio.

Marca branca

A marca do distribuidor segue sendo protagonista nas eleccións dos consumidores para mitigar o avance xeneralizado do custo da cesta e seguiu crecendo en 2025 gañando 0,9 puntos máis que o ano anterior e situándose nun 50% do total do gasto. Con todo, matiza o estudo que esa convivencia entre os distintos tipos de marca fai cada vez máis palpable, pois en 2025 hai un achegamento entre as marcas de fabricante e marcas da distribución froito, en parte, dun maior esforzo promocional das primeiras.

Ademais, di NIQ que en 2025 continuou o auge do e-commerce. Aínda que as tendas físicas continúan sendo o punto central das compras, o online está triplicando o seu crecemento, en concreto un 17,7%, fronte ao 9,1% de súper pequenos ou o 7,6% dos grandes. O impulso deste canal tamén se sitúa na aceleración da frecuencia, con crecementos do 8% e alcanza xa un peso do 7,3% na cesta da compra.