Nauterra acelera o seu crecemento nun 2025 “extraordinario” e alcanza unha facturación récord de 765 millóns
A antiga conservas Calvo disparou o seu ebitda un 25%, ata os 80 millóns de euros nun exercicio no que todas as súas áreas tiveron “un desempeño sobresaliente”.
Mané Calvo, conselleiro delegado de Nauterra / Ángel Vinuesa
Comentarios
Nauterra, a antiga Conservas Calvo, marcou récord de facturación e vendas no pasado 2025, un exercicio que o seu conselleiro delegado, Mané Calvo, cualificou de “extraordinario”. Segundo os datos facilitados este luns polo grupo con sede en Carballo, a compañía acelerou o ritmo de crecemento en todas as súas métricas. A facturación creceu un 5,2% ata os 765 millóns de euros, fronte ao incremento dun 4,4% do exercicio anterior. O ebitda, resultado antes de impostos, taxas, amortizacións e depreciacións, situouse nos 80 millóns de euros, cun espectacular avance dun 25%, tamén por riba dos avances do exercicio 2024.
Segundo o grupo, todas as áreas de actividade lograron un “desempeño sobresaliente”, impulsando “a fortaleza das súas marcas, a súa diversificación xeográfica e a optimización da súa operativa industrial e pesqueira”. Nauterra elevou, ademais, un 9,4% a comercialización das conservas de peixe e o aceite, un avance tamén de récord.
“Récord en facturación, ebitda e volume”
O conselleiro delegado do grupo conservero, Mané Calvo, destacou que o 2025, no que cumpriron 85 anos de historia, “foi un ano extraordinario, que consolida o noso modelo de negocio e o noso crecemento”. “Celebrar 85 anos con resultados récord en facturación, ebitda e volume é o mellor recoñecemento ao esforzo dos nosos equipos e á confianza de millóns de consumidores”, expuxo, para indicar as fortalezas da compañía. “A optimización da flota, a disciplina operativa e a fortaleza das nosas marcas prepárannos para seguir crecendo de forma rendible e sostible nos nosos mercados clave”, expón.
En canto a mercados, Brasil mantense como a primeira praza de Nauterra en termos de volume, seguido de España, Italia, Centroamérica e Arxentina.
O xigante da conserva tamén incrementou plantilla en 2025, fixo un 5%, ata os 5.654 empregados.
