O Vamtac de Urovesa conquista Singapur, que se converte no seu maior cliente en Asia

Urovesa suma e segue. Á espera do desenvolvemento dos plans especiais de modernización, pedra angular sobre a que orbitan as grandes inversións en defensa e seguridade, a compañía galega pesca contratos no exterior. E faino a cabalo do seu produto estrela, o Vamtac.

A empresa que dirixe Justo Sierra asinou un terceiro contrato coas Forzas Armadas de Singapur para entregarlle máis dun cento de novos vehículos de alta mobilidade táctica. Tras completar este terceiro contrato SAF converterase “no maior cliente” da empresa galega na zona de Asia-Pacífico.

“Este é un novo fito na nosa longa relación comercial co país, que comezou en 2013 coa firma do primeiro contrato, que implicaba a entrega dunha flota de 50 vehículos máis”, indicaron fontes da compañía.

Urovesa pechou a finais do ano pasado outro gran contrato, neste caso, en España. O Ministerio de Defensa adxudicou á compañía galega a adquisición de uns 100 vehículos de exploración e recoñecemento terrestre (VERT) por 321,4 millóns. No caso de Singapur, non se detalla a cantidade á que ascende o encargo.