Os pactos da UE con Mercosur e India facilitan a expansión de Inditex, en retroceso en China e sen Rusia

En espera de ver como se materializan finalmente os recentes acordos comerciais da Unión Europea con Mercosur e con India, deixando de lado as fortes protestas que o primeiro desatou no sector agroalimentario, a imaxe fixa de ambos reflicte novas vendas de oportunidade para Inditex, a compañía de maior capitalización do Ibex. Os de Marta Ortega e Óscar García Maceiras atravesan un momento doce, de novo co favor dos analistas e o mercado e coa previsión de volver aumentar o ritmo de vendas. Pero os de Arteixo saben que para crecer aínda máis precisan seguir investindo e facerse fortes en novos mercados. É certo que se expanden en Europa e en EE UU pero tamén é verdade que xa non están, como o resto das téxtiles comunitarias, no outrora puxante mercado ruso e que o mercado chinés leva anos replegándose para as marcas occidentais.

Por un ou outro motivo, o certo é que a Inditex, os tratados de Mercosur e India, que sobre o papel facilitarán a exportación das empresas europeas, collérono en plena expansión tanto no país asiático como en Brasil. Máis camiño para crecer.

Mercosur

Segundo a Comisión Europea, o acordo con Mercosur que trae de cabeza aos produtores galegos facilitará a exportación ás empresas da UE que fabrican e venden no sector agroalimentario, maquinaria, produtos farmacéuticos, automóbiles e téxtiles e roupa.

O organismo comunitario defende que os tradicionalmente elevados aranceis de Mercosur encarecen os produtos europeos nestas latitudes. “O acordo eliminará os dereitos de importación sobre máis do 91% dos produtos da UE exportados ao Mercosur. Os dereitos para algúns produtos liberalizaranse durante períodos de escalonamento máis longos, para que as empresas dos países do Mercosur dispoñan de tempo suficiente para adaptarse”, expoñen. Actualmente, Mercosur impón altos aranceis ás importacións de produtos europeos: un 35% aos coches pero tamén a roupa e téxtiles e zapatos de coiro. Destacan tamén gravames de entre o 20 e o 35% ás bebidas espirituosas, o 27% ao viño, e entre o 14 e o 18% a pezas de coches.

Actualmente, Galicia exporta principalmente a estes países vehículos, maquinaria e equipos eléctricos. No lado contrario, no das importacións, case o 90% dos produtos que chegan á comunidade proceden do sector agroalimentario. Os últimos datos do IGE (Instituto Galego de Estatística) para un ano completo, o de 2024, sitúan en 862 millóns as importacións galegas, dos que 700 millóns estarían vinculados á industria alimentaria.

A moda mira a Brasil

Pero, máis alá dos datos galegos, neste escenario, dos catro países que conforman Mercosur (Arxentina, Brasil, Uruguai e Paraguai), é o territorio brasileiro o que acapara as miradas dos grandes da moda, como territorio en expansión con maior poder adquisitivo. E iso, claro está, tamén inclúe a Inditex, que xa leva anos crecendo nese mercado de forma discreta. Así o din os seus números.<…