Relevo xeracional e liderado feminino: as claves do terceiro foro ‘Mulleres dos Mares’ de Gadis

Gadis conmemorou o Día Internacional das Mulleres no sector marítimo celebrando a terceira edición do foro “Mulleres dos Mares” celebrado no Museo do Mar de Galicia en Vigo. O acto reuniu mulleres con distintas responsabilidades en empresas provedoras da compañía, destacando o seu papel clave no motor socioeconómico galego. “Desde a pesca e a acuicultura, ata a conserva e a transformación, a súa liderado en toda a cadea de valor é fundamental para o presente e o futuro do sector”, explican desde a compañía. Ademais, nesta edición tamén se puxo o foco no relevo xeracional das empresas familiares e tamén na importancia da sustentabilidade medioambiental con proxectos de economía circular.

“Unha empresa non se constrúe con cifras, senón con persoas, relacións duradeiras e cun compromiso real co entorno no que traballa”. Son as palabras da directora de Marketing e RSC de Gadisa Retail, Melisa Pagliaro, que tamén subliñou a responsabilidade da compañía cos seus clientes e provedores: “Hoxe somos unha empresa máis grande, con máis de 480 puntos de venda, somos máis de 9.300 persoas e traballamos con máis de 900 provedores locais de alimentación”. 

Relevo xeracional

A compañía destaca que a presenza feminina nas empresas familiares vinculadas ao sector do mar é cada vez máis importante. Esta idea foi refrendada por dúas das protagonistas da xornada da campaña de Gadis Mulleres dos Mares. Silvia López, xerente de Piscilor, repasou a historia empresarial desta piscifactoría de troitas de acuicultura situada en Quiroga desde 1979 e fundada por tres familias, que aínda seguen formando parte da firma. “Gustaríame que moitas mulleres se animaran e aproveitasen estas experiencias porque necesitamos outra visión”. Tamén indicou que “Gadis, para nós, é prestixio construído con anos de dedicación, facilidade en cada proceso e proximidade no trato”.

Por outra banda, a xerente de Salimar, María Gómez, recordou o coñecemento e a experiencia transmitida pola súa avoa ao seu pai, fundador da empresa, e tamén a ela. Gómez representa a segunda xeración desta empresa familiar que apostou pola innovación para atopar un oco no mercado con produtos do mar minimamente procesados. Sobre Gadis comentou que “é unha empresa fiable, que dá un bo servizo aos seus clientes e á vez é sinónimo de produtos de calidade. Ofrécenos o escaparate perfecto para chegar a un consumidor cada vez máis esixente”.

Economía circular 

O acto tamén contou coa participación da responsable de Medio Ambiente do Grupo Frinsa, Elena García, que explicou un proxecto de valorización no que están a traballar: “Imos transformar unha parte importante dos residuos orgánicos que xeramos durante a actividade nun gas renovable, un biogás; todo enmarcado nunha estratexia de economía circular”. 

García tamén aludiu que progresivamente se comeza a avanzar cara a un gran cambio no sector con máis postos femininos técnicos e de responsabilidade. “Gadis é, para o Grupo Frinsa, un cliente estratéxico. Compartimos unha paixón por facer ben as cousas, un compromiso co coidado social, o coidado humano e o coidado do entorno”.