O Sindicato Labrego advirte do golpe da seca e ve cada vez «máis inviable producir en Galicia»

O Sindicato Labrego Galego dá voz de alerta polo impacto da seca no sector gandeiro. A través dun comunicado, o SLG denunciou a, ao seu xuízo, “absoluta inacción” da Consellería do Medio Rural ante unha seca que “afoga as granxas” da comunidade.

É por iso que a organización volveu esixir que se constitúa un grupo de traballo para facer fronte ás consecuencias do cambio climático nas explotacións. Todo iso para reverter unha situación que fai que cada vez sexa “máis inviable producir en Galicia“, especialmente nalgunhas zonas e nos cultivos de verán, debido á escaseza de chuvia e ás altas temperaturas, o que levou á redución dos ingresos de moitas familias que viven da agricultura e gandería.

Como exemplo puxeron a “desastrosa” campaña de recollida de herba para o vacún, o que levou a que moitas granxas estean a consumir forraxe antes de tempo. Igualmente, o cultivo do millo sofre os efectos da seca e prevéase unha colleita insuficiente e de peor calidade. Todo iso repercutirá agravando aínda máis a crise de prezos, avisaron.

As consecuencias da seca chegan tamén a outras actividades, como a apicultura, sinalaron desde o SLG, que vén denunciando desde 2020 a “inacción” da administración galega. Ao respecto, criticaron a falta de medidas “reais” de axuda ao sector e reclamaron un pacto social coas organizacións agrarias para deseñar liñas de axuda estables e garantir a viabilidade económica das “cada vez menos granxas” que quedan no territorio.

Desde o sindicato reclaman un plan integral para que as explotacións poidan adaptarse á nova realidade climática e cambiar a orientación das axudas actuais, buscando a preparación das granxas para afrontar episodios de seca. Tamén esixiron axudas directas e unha mesa permanente, e lembraron que a alimentación e o papel social dos agricultores e gandeiros “son un dos bens máis valiosos que ten un pobo”.

Axudas polos danos da fauna silvestre

En paralelo, o Sindicato Labrego Galego censurou que as axudas para a prevención de danos causados pola fauna silvestre son insuficientes, e que algunhas granxas xa recibiron a desestimación das súas solicitudes por esgotamento do crédito consignado.

Esta situación, indicou a organización, “repítese ano tras ano”, o que demostra que os fondos non chegan para cubrir a demanda real das explotacións. Ademais, lembraron que estas axudas preventivas son máis eficaces e baratas que as destinadas a cubrir as perdas ocasionadas por ataques de fauna silvestre.