Stellantis ofrece compensacións a máis de 3.000 afectados polos fallos dos seus motores.
O fabricante de coches con planta en Balaídos ofrece á asociación Afestel, que representa aos afectados polos fallos dos motores Pure Tech, reembolsos, revisións e reparacións.
Imaxe da concentración dos membros da Asociación de Afectados Stellantis (Afestel) diante da planta de Balaídos / Afestel
Comentarios
Stellantis, o fabricante de coches con planta en Balaídos, ofreceu á asociación de afectados polos motores Pure Tech, Afestel, reembolsos, revisións e reparacións. A asociación agrupa a máis de 9.000 membros e presentou 3.000 demandas.
“Tras intensas negociacións entre o equipo xurídico de Afestel e Stellantis, a compañía puxo sobre a mesa unha serie de medidas dirixidas aos socios de Afestel co obxectivo de paliar o dano ocasionado”, apuntou a organización.
Segundo detalla Afestel, o xigante automobilístico ofrece reembolsos económicos, agardando Afestel que os acordos alcancen un millón de euros antes de fin de ano.
Tamén a firma propón revisións completas e gratuítas dos coches, como ampliar a garantía oficial a 10 anos ou 180.000 quilómetros, así como a reparación total fronte a avarías futuras relacionadas coa correa defectuosa.
Prazo para aceptar a oferta
Afestel indica que o prazo para aceptar esta oferta expira o 30 de novembro. Ata a data, máis de 3.000 socios de Afestel aceptaron a garantía estendida, mentres que uns mil casos seguirán por vía xudicial para reclamar compensacións adicionais. Ademais, preto de 700 afectados optaron por sumarse á demanda colectiva penal en Francia por depreciación do vehículo e danos sufridos.
“A mellor solución sería a retirada completa do motor PureTech e unha indemnización xeneralizada. Ningunha das dúas cousas aconteceu”, afirma Yerba Luca de Tena, presidente de Afestel.
