Telefónica creará un laboratorio con «robot humanoide» para a ciberseguridade de Galicia

Telefónica apuntalará a estratexia de ciberseguridade da Xunta coa creación dun laboratorio e centro de demostración na Cidade da Cultura de Santiago, unha ubicación temporal ata que poida instalarse no Centro de Ciberseguridade de Galicia que constrúe Oreco Balgón en Ourense. O encargo parte da Axencia para a Modernización Tecnolóxica de Galicia (Amtega), que activou a finais do ano pasado o primeiro contrato dun acordo marco para o desenvolvemento, entre outras actuacións, desta instalación, orzamentada en 1,8 millóns.

O laboratorio e centro demostrador, de feito, forma parte dunha iniciativa maior que inclúe dous laboratorios e centros demostradores complementarios. O que prepara Telefónica centraráse na ciberseguridade en produtos con elementos dixitais, mentres que un segundo laboratorio e centro demostrador en ciberseguridade industrial foi adxudicado a Inprosec Auto por 2,5 millóns. Ambos enmárcanse no proxecto RETECH e están promovidos pola Xunta en colaboración co Instituto Nacional de Ciberseguridade (INCIBE), entidade dependente do Ministerio para a Transformación Dixital e a Función Pública, a través da Secretaría de Estado de Telecomunicacións e Infraestruturas Dixitais.

O laboratorio de Telefónica

Telefónica instalará demostradores tecnolóxicos para observar a aplicación de tecnoloxías de ciberseguridade en sectores estratéxicos. Entre eles, está o de avaliación e validación de ciberseguridade de todo tipo de produtos e servizos con elementos conectados, a monitorización da calidade do aire en edificios intelixentes, o uso de xemelgos dixitais para xestión urbana en cidades intelixentes, o CyberRange ou plataforma para a simulación de ciberataques, un laboratorio forense para a análise de hardware, firmware e vulnerabilidades, a xestión segura de flotas para vehículos conectados, o traballo en agricultura intelixente para a predición de enfermidades en cultivos ou a interacción e validación de seguridade en robótica e especificamente no robot humanoide Unitree G1 U1.

Dentro dos servizos prestados por este centro está tamén o desenvolvemento de funcións e servizos para a cidadanía, as empresas e os estudantes. Traballará, por exemplo, no fogar dixital e as solucións para a soidade non desexada, as probas e certificación de dispositivos IoT, formación en ciberseguridade, incubación e aceleración de startups, formación na normativa de ciberseguridade (CRA, NIS 2) á que teñen que adecuarse as empresas, organización de eventos, un observatorio de ciberseguridade para a elaboración do Libro Branco de Ciberseguridade de Galicia e, entre outros, un espazo experiencial para a divulgación tecnolóxica e a sensibilización cidadá, segundo explicou o grupo nun comunicado.

Aplicación da IA ou a cuántica

En palabras do director do Territorio Norte de Telefónica España, Manuel Ángel Alonso, «este centro permitirá posicionar a Galicia como un referente nacional e internacional en ciberseguridade, e nel teremos a dispoñibilidade, por exemplo, dun robot humanoide, que permitirá tamén traballar na aplicabilidade de tecnoloxías como a IA ou a cuántica na axuda ás persoas e ás empresas».

Esta iniciativa levarase a cabo no marco dos fondos do Plan de Recuperación, Transformación e Resiliencia, financiado pola Unión Europea, e con ela a Xunta de Galicia e Telefónica impulsan un ecosistema de innovación en ciberseguridade e IoT que permitirá que medianas e pequenas empresas poidan acceder, de forma gratuíta, a recursos avanzados, coñecemento especializado e apoio técnico para anticipar riscos, protexerse fronte ás novas ameazas dixitais e cumprir coa nova regulación europea.