Traballadoras do téxtil galego saen á rúa contra o convenio da patronal de Inditex, H&M e Mango

Traballadoras do sector téxtil protestaron este luns en diferentes cidades da comunidade en protesta pola inclusión da súa actividade no convenio proposto pola patronal ARTE (Asociación Retail Textil de España), na que se integran xigantes como Inditex, H&M, Mango, Primark ou Tendam, a nivel estatal, e esixen que se manteña o seu convenio propio provincial.

Así o explicou ante os medios de comunicación na protesta de Santiago Miriam Cuíña, delegada da CIG, que expresou o seu rexeitamento á inclusión neste convenio de ámbito estatal e pediu que se respecte o seu “convenio provincial, que tanto tempo nos custou”.

“Traballamos aquí, queremos negociar o convenio aquí, non queremos ter un convenio a nivel estatal en Madrid, que non temos capacidade para negociar”, explicou a representante.

A aplicación deste convenio, asegurou, suporía “a perda dun montón de dereitos que xa estaban adquiridos”, así como “unha perda de diñeiro substancial” e, sobre todo, “perda de melloras a nivel de conciliación e licenzas”.

“Entón, realmente perderiamos a maioría das condicións que temos a día de hoxe e pasaríamos a ter un convenio peor, xa non só a nivel diñeiro, senón a nivel de dereitos de conciliación, nun comercio maioritariamente feminizado. Sería un paso atrás gravísimo”, denunciou.

Perda económica de 3.000 euros anuais

Miriam Cuíña cifrou en uns 3.000 euros anuais a perda económica que suporía para unha traballadora a tempo completo, á que habería que sumar a eliminación dos descansos como tempo de traballo.

Neste panorama, os representantes dos traballadores instaron á patronal a “sentarse a negociar” e reclamaron que non “deixen aos seus traballadores en mans de xente que lles quere meter un convenio que lles prexudica”. A situación afecta, en datos da CIG, a unha media de 35.000 persoas.