Os traballadores de Losán denuncian impagos e piden un xiro no plan de reestruturación

O comité de empresa de Industrias Losán move ficha tras o plan de reestruturación pactado pola compañía. O seu presidente, Xosé Anxo Sánchez, reclamou un plan “claro” para garantir a actividade industrial no grupo ao considerar que o da empresa crea “bastante incerteza”.

Nunha rolda de prensa celebrada na sede da CIG, Sánchez denunciou que este plan non inclúe medidas “de viabilidade para garantir a actividade industrial”. Tampouco fai mención, segundo o seu relato, á “reactivación das plantas, con garantías de emprego e de carga de traballo”. Ademais de incidir na débeda existente e nas medidas a adoptar para o pago da mesma, insistiu en que os traballadores viven nunha situación de “incerteza”.

É por iso que reclamou “un plan de como se van activar as fábricas” e abordar “mercados de produción e vendas” en contraposición a unha proposta que considerou “conxecturas”. “Vai máis enfocado a eludir a débeda o máximo posible e salvagardar o seu patrimonio”, engadiu.

“Non vai destinado a salvagardar o emprego”, insistiu en referencia ás “200 familias” afectadas en distintos concellos da provincia da Coruña.

Tras cualificar de “desoladora” a situación, debido, entre outras cousas, ás nóminas que se adebedan aos empregados, Sánchez reclamou á Xunta unha reunión urxente “para analizar a situación e aclarar as intencións da empresa”.