Vegalsa-Eroski gaña 55 millóns, un 5% máis, e crea 400 empregos en 2025
A facturación incrementouse un 5,4%, ata os 1.737 millóns, e os investimentos na rede de tendas, formada por 291 establecementos, elevaronse aos 40 millóns, un 13% máis.
José Manuel Ferreño Sánchez, director xeral de Vegalsa-Eroski
Comentarios
Vegalsa-Eroski pecha outro exercicio ao alza. A compañía que dirixe José Manuel Ferreño rematou o 2025 cun incremento en vendas, beneficios e investimentos, que lle permiten consolidar a súa posición como un dos principais grupos de distribución alimentaria de Galicia, froito da alianza fai case 30 anos entre a galega Vegonsa e o grupo de base cooperativa vasco Eroski.
A compañía acadou os 1.737 millóns de facturación, o que supón un incremento do 5,9% respecto a 2024. Mantén o pulso entre os maiores grupos galegos por volume de negocio, xunto a Inditex, Megasa ou Gadisa. O resultado neto creceu nun 5,4%, segundo indica nun comunicado, o que situaría os beneficios en case 55 millóns.
A cadea de supermercados, que opera coas marcas Eroski, Autoservizos Familia e Cash Record, pechou o ano con 291 establecementos, aos que destinou 40 millóns en investimentos. A superficie total destinada a sala de vendas é de 258.557 metros cadrados. A maior parte da rede son tendas propias, un 70%, mentres que o 30% restante son franquías. Vegalsa-Eroski é un dos grupos alimentarios con maior capilaridade na comunidade, xunto a Gadisa e Froiz, aínda que opera tamén en Asturias e Castela e León,
Máis de 8.000 traballadores
A compañía creou no pasado exercicio 400 novos postos de traballo, ata acadar unha plantilla media de 8.120 persoas, aos que se suman 1.100 empregos indirectos vinculados á súa rede de franquías. Neste ámbito, cabe destacar que a compañía participou no programa Retorna Cualifica Emprego da Xunta de Galicia, que permitiu a incorporación de 30 persoas, segundo indica nun comunicado.
O desempeño do exercicio estivo apoiado por “medidas orientadas a gañar eficiencia operativa, optimizar procesos e reforzar a colaboración cos seus provedores”. En paralelo, destinou un maior investimento a ofertas e promocións na súa proposta comercial, ademais de reforzar a marca propia. Ao xuízo de José Manuel Ferreño, a aposta deparou uns resultados positivos, que reflicten a “solidez” do modelo de negocio e a capacidade para adaptarse a un entorno complexo.
“A nosa proposta comercial, baseada no equilibrio entre calidade en frescos, aforro e produto local, permitiunos seguir gañando cota no conxunto de territorios nos que temos presenza -Galicia, Asturias e Castela e León-, así como reforzar a nosa posición de liderado no noso mercado principal, Galicia, mantendo unha cota superior ao 21%, segundo datos Nielsen“, di o director de Vegalsa-Eroski no comunicado.
