Wizz Air colma o baleiro de Ryanair e abre en Santiago a única base dunha aeroliña en Galicia

Espaldarazo de Wizz Air ao Aeropuerto de Santiago-Rosalía de Castro. A compañía húngara anunciou este xoves a apertura dunha base na terminal compostelá a partir do próximo mes de febreiro.

Tratarase da única instalación deste tipo en Galicia xa que a última que permanecía activa (a de Ryanair tamén en Santiago) pechouse a finais do ano pasado.

Imaxe da rolda de prensa na que se anunciaran os plans de Wizz Air en Santiago de Compostela / Concello de Santiago

Nunha rolda de prensa celebrada este xoves no Concello de Santiago e na que participaron, ademais de representantes da compañía, a alcaldesa de Santiago, Goretti Sanmartín; e o conselleiro de Presidencia, Xustiza e Deportes, Diego Calvo, tamén se deu a coñecer que Wizz Air operará xa desde decembro as súas rutas con Roma e Varsovia.

Ademais, a partir de febreiro está previsto que Wizz Air conecte a capital galega con oito cidades españolas (Madrid, Valencia, Bilbao, Gran Canaria, Tenerife, Fuerteventura, Málaga e Zaragoza).

Os billetes para todas as rutas estarán dispoñibles a partir do 30 de xullo. As primeiras operacións comezarán o 1 de decembro coa ruta Varsovia-Modlin e Santiago (xoves e sábado), seguida polo enlace con Roma Fiumincino o 14 de decembro (luns e venres).

Wizz Air, que tamén anunciou a apertura de bases nos aeroportos de Madrid e Valencia, insufla, deste xeito, aire ao aeroporto de Lavacolla tras a fuxida de Ryanair. Neste sentido, os participantes na rolda de prensa reivindicaron a importancia de abrir base dunha aeronave en Lavacolla. Facelo permite incrementar a flexibilidade da rede e crear a infraestrutura necesaria para seguir crecendo e continuar engadindo rutas.

O ‘puzzle’ de Wizz Air

“A apertura da nosa nova base en Santiago marca outro fito importante na expansión de Wizz Air en España, tras a posta en marcha das nosas dúas primeiras bases españolas en Madrid e Valencia a principios deste mes. Este anuncio forma parte do noso ambicioso plan de crecemento a cinco anos para España, co que aspiramos a ampliar significativamente a nosa presenza e conectividade en todo o país”, comentou o responsable de Rede da compañía, Samuel Ferrera.

Na rolda de prensa tamén achegaron algúns datos de contexto para enmarcar o peso de Wizz Air, cunha flota de 270 avións -na súa maioría Airbus Neo-, “a máis moderna e máis eficiente do mercado”. A aeroliña húngara transportou o ano pasado a uns 89 millóns de pasaxeiros mediante 1.000 rutas a máis de 200 destinos, con máis de 1.000 voos diarios.

Por outra banda, as autoridades puxeron o foco no traballo realizado e na confianza en que estas “boas novas” sirvan de reclamo. Diego Calvo agradeceu á compañía a súa aposta, “importante” non só para Santiago senón para toda Galicia. Ademais de agradecer a colaboración institucional, comprometeu todo o apoio do Goberno autonómico para “consolidar” esta tendencia.

Para Goretti Sanmartín este é un día “moi feliz”, froito dun “intenso” traballo. A alcaldesa destacou a importancia da ruta italiana, dado que o mercado transalpino é o segundo en importancia a nivel turístico para Santiago, por detrás dos Estados Unidos. Sobre isto, lembrou que en maio se inaugurou a ruta aérea con Nova York. Así, recalca que Santiago conta este verán con 17 rutas internacionais a tres continentes distintos. “Seguiremos traballando para que se manteña no inverno e que sigan crecendo”, concluíu.