Xornada de folga en Textil Lonia (Carolina Herrera): “Venden bolsos a 3.000 euros pero con salarios mileuristas”
Ourense acolleu a terceira xornada de protesta no que vai de ano dos empregados da compañía dos irmáns Domínguez, cun seguimento dun 80% no persoal de fábrica, segundo os sindicatos.
Xornada de folga do persoal da fábrica de Textil Lonia, que se concentra diante dunha tenda de Purificación García en Ourense. Foto: CIG
Comentarios
Ourense acolleu este xoves a terceira xornada de folga no que vai de ano dos traballadores de Textil Lonia, a compañía en mans dos irmáns Domínguez que explota as marcas Carolina Herrera e Purificación García. Exixen melloras salariais e das condicións laborais e, segundo os sindicatos convocantes, a protesta foi secundada polo 80% do persoal de fábrica da compañía.
Segundo indica a CIG, esta nova xornada de paro tivo “un seguimento practicamente total entre as persoas empregadas cos salarios máis baixos, mentres que o persoal de oficina, con soldos pactados coa empresa, optou por non sumarse á convocatoria”.
Máis concentracións
Manuel González, de UGT, indicou que esta terceira xornada de folga a folga contou cun seguimento de arredor do 80%. “En 25 anos é a primeira vez que as traballadoras están organizadas para esixir melloras nas condicións laborais”, engadiu.
Tras unha asemblea en sala sindical, a resposta dos traballadores foi “contundente” ante a iniciativa de “continuar coa loita”, tal e como explicou a secretaria comarcal da CIG en Ourense, Xulia González. En concreto, a partir da próxima semana, os traballadores levarán a cabo “concentracións diarias” fronte ás tendas de Carolina Herrera e Purificación García na cidade.
Trátase dunha xornada que se suma a outras dúas realizadas o 5 de xaneiro e este pasado mércores, así como dous paros durante o mes de decembro, tras ter mantido os traballadores unha reunión con representantes da empresa este martes.
As demandas da parte social
Segundo informou Xulia González, as principais demandas son de índole económico, con traballadores que “levan máis de 20 anos nesta empresa” e “cobran un salario líquido de 950 ou 970 euros”. “É algo triste, irrisorio e precario cando nunha tenda ves un bolso que ten un custo de 3.000 euros”, engadiu. Así mesmo, os traballadores esixen “maior flexibilidade horaria” para aqueles que “poidan ter problemas de conciliación” familiar.
“A nosa reivindicación é para mellorar as condicións de todas as persoas que traballan en Textil Lonia, porque hai un acoso brutal e unhas esixencias que non se poden permitir”, lamentou Xulia González. Nesta liña, explicou que durante a reunión mantida coa empresa este pasado martes, “o único esforzo que fixo foi ofrecer dous euros máis, para un café”.
“É algo ridículo, non se pode permitir“, engadiu Xulia, que explicou que os traballadores puxeron sobre a mesa unha contraproposta á espera de que “a empresa recapacite”. “É un insulto para as persoas traballadoras, que son as que defenden os beneficios que ten a empresa diariamente e que están tendo unha prisión e esixencias brutais, non só a nivel físico, senón tamén psicolóxico”, lamentou.
